Вазорати корҳои дохилии Тоҷикистон гуфтааст,ки  дар бораи дар қаламрави шарҳи Кишиневи Ҷумҳурии Молдова боздошт шудани яке аз раҳбарони созмони сабтиномнашудаи “Анҷумани нирӯҳои созанда” хабар надоранд. 

Ин дар ҳолест, ки аъзои ин созмони мухолифи ҳукумати Тоҷикистон дар бораи дар фурудгоҳи Кишинев боздошт шудани Собир Валиев хабар доданд. Дар хабарҳо гуфта мешавад, ки Валиевро бо дархости Тоҷикистон бо иттиҳоми “экстремизм” дастгир карда эҳтимолан ба Тоҷикистон истирдод мекунанд. Ӯро ҳангоми кӯшиши аз Кишинев ба Истамбул парвоз карданаш марзбонон боздошт карданд.  Аъзои ин созмон таъкид мекунанд, ки Собир Валиев 8 соли охир шаҳрвандии Қирғизистон аст ва дар Истамбул кору фаъолият мекард. Баъди кушта шудани раҳбари созмони “Гурӯҳи 24” дар Истамбул моҳи марти соли 2015, Валиевро муовини раиси ин созмон интихоб карданд. Собир Валиев, зодаи шаҳри Душанбе, 26 сол дошта, ихтисосаш иқтисодшинос аст. Ӯ соҳиби оила ва 3 фарзанд буда, худро як фаъоли мухолифин муаррифӣ мекард.

Фарзонаи Хуршед, Меҳрнигори Рустам ва Афзалшоҳи Шодӣ чӣ?

Тавассути дурбинҳои “Шаҳри бехатар” қоидавайронкуниҳои ситораҳои эстрадаи тоҷик-Шабнами Сурайё, Фарзонаи Хуршед, Афзалшоҳ Шодиев, Меҳрнигори Рустам, Шаҳроми Абубакр, Гулрӯ Табарова ва Сарвиноз Юсуфӣ ба қайд гирифта шуд. 
Тавре ки  аз Вазорати корҳои дохилии Тоҷикистон хабар доданд, аз ҷониби ронандаи автомашинаи «Рэнҷ–Ровер» аломати қайди давлатиаш 0007 ВР 01, ки ба Фарзонаи Хуршед тааллуқ дорад, аз 15 ноябри соли 2013 то 23 июни соли 2015 23 далели вайронкунии қоидаҳои ҳаракат дар роҳ содир карда шуда, тавассути воситаҳои махсуси техникии низоми худкори идоракунӣ дар соҳаи нақлиёт сабт гардидааст: Барои 18 ҳолат Фарзонаи Хуршед 4990 сомонӣ ҷаримаро ба буҷаи давлат супорида, ҷаримаи 5 ҳолати дигар ҳанӯз пардохт нашудааст.
Ба иттилои манбаъ, бо автомашинаи тамғаи «Порше-Кайэн» аломати қайди давлатиаш 0008 ВВ 01, ки ба Шабнами Сурайё тааллуқ аз 01 феврали соли 2014 то 04 августи соли 2015 8 ҳолати нақзи қоидаҳои ҳаракат дар роҳ содир карда шудааст, ки ҷаримаи он то ҳол пардохт нагардидааст. Ин ниҳод афзуд, ки Афзалшоҳ Шодиев низ бо автомашинаи тамғаи «Тойота-Лэнд Круйзер» аломати қайди давлатиаш 6262 АС 01 аз санаи 03 ноябри соли 2013 то 07 августи соли 2015 27 бор қоидаҳои ҳаракат дар роҳро вайрон намудааст: “Барои 12 далели қоидавайронкунӣ 2560 сомонӣ ба буҷаи давлат супорида шуда, ҷарима 15 далели боқимонда ҳанӯз пардохт нашудааст”.
Шаҳроми Абубакр низ бо автомашинаи «Тойота-Королла» аломати қайди давлатиаш 0010 СО 01 аз 23 октябри соли 2014 то 02 июли соли 2015 дар 15 ҳолат ба қоидавайронкунӣ роҳ додааст: “Барои 4 далели қоидавайронкуниҳои ҳаракат дар роҳ, Шаҳроми Абубакр 700 сомонӣ пардохт карда, маблағи 11 далели дигар ҳанӯз ба буҷаи давлат ворид нашудааст”.
Инчунин бо иштироки «Лексус-GX470» аломати қайди давлатиаш 7111 AD 01, ки ба Табарова Гулрӯ тааллуқ дорад, аз 25 январ то 07 июни соли 2015 3 далели вайронкунии қоидаҳои ҳаракат дар роҳ сабт шудаанд, ки маблағи он ҳанӯз пардохт нагардидааст. 
Меҳрнигори Рустам, овозхони ҷавони тоҷик низ, ки соҳиби «Тaйотоа-Королла», аломати қайди давлатиаш 6600 АТ 01 мебошад, аз санаи 02-юми ноябри соли 2013 то 01 августи соли 2015, 19 бор қоидаҳои ҳаракат дар роҳро вайрон намудааст: “Барои 4 ҳолати қоидавайронкунӣ Меҳрнигори Рустам 840 сомонӣ ҷарима супорида, маблағи 15 далели боқимонда носупорида мондааст”.
Вазорати корҳои дохилӣ илова намуд, ки бо автомашинаи тамғаи «Мазда-СХ7», аломати қайди давлатиаш 8686 ВА 01, ки ба Сарвиноз Юсуфӣ тааллуқ дорад, аз санаи 01-уми декабри соли 2013 то 22 июли соли 2015 - 8 далели вайронкунии қоидаҳои ҳаракат дар роҳ содир карда шудааст, ки ҷаримаи он то ҳол пардохт нагардидааст.

Имрӯз дар толори маҷлисгоҳи Донишкадаи идоракунии давлатии назди Президенти Ҷумҳурии Тоҷикистон бахшида ба Рўзи байналмилалии ҷавонон мулоқоти Раиси Кумитаи ҷавонон, варзиш ва сайёҳии назди Ҳукумати Ҷумҳурии Тоҷикистон Аҳтам Абдуллозода бо донишҷӯёни тоҷик, ки дар хориҷи кишвар таҳсил мекунанд, доир гардид.  

Дар чорабинӣ ҳамчунин, Раиси Кумитаи кор бо занон ва оилаи назди Ҳукумати Ҷумҳурии Тоҷикистон Хидирзода Махфират,  муовини якуми Вазири меҳнат, муҳоҷират ва шуғли аҳолӣ Сангинзода Эмин, намояндагони Вазорати корҳои хориҷӣ, Вазорати маориф ва илми Ҷумҳурии Тоҷикистон, Директори «Маркази Барномаҳои байналмилалии назди Президент» Шодиев Исматулло ва меҳмонони хориҷӣ иштирок ва суханронӣ карданд.

Раиси Кумитаи ҷавонон, варзиш ва сайёҳӣ Аҳтам Абдуллозода зимни суханронӣ таъкид дошт, ки мақсад аз баргузории чорабинӣ муттаҳид сохтани ҷавонони дар хориҷ таҳсилдошта вобаста ба пуштибонӣ ва таблиғи дастовардҳои воқеии кишвар дар роҳи бунёди ҷомеаи демократӣ, ҳуқуқбунёд, дунявӣ, инчунин ҳавасманд гардонидани донишҷўёни болаёқат барои хизмати шоён ба давлату миллати хеш мебошад. Номбурда изҳор дошт, ки айни замон дар хориҷи кишвар бештар аз 12 ҳазор донишҷӯи тоҷик таҳсили илм менамоянд ва таъсиси Маҳфили ҷавонони дар хориҷи кишвар таҳсилдошта, барои дастгирию муаррифӣ ва ба ин васила ҳал кардани мушкилоти  онҳо мусоидат менамояд.

Гуфта шуд, ки ҷавонони дар хориҷ таҳсилдошта хушбахтарин ҷавонон мебошанд. Зеро шароити мусоид ба онҳо имконият додааст, ки дар донишгоҳҳои бонуфӯзи хориҷ таҳсил карда, мутахассиси касбӣ гарданд.

Аҳтам Абдуллозода аз дастгириҳои пайвастаи Ҳукумати Тоҷикистон ва Президенти мамлакат Эмомалӣ Раҳмон нисбат ба ҷавонон ёдовар гардида, таъкид намуд, ки ҷавонон низ дар хориҷ аз кишвар бояд барои муаррифи Тоҷикистон дар арсаи байналмилалӣ саҳми калони худро гузоранд.

Дар чорабинӣ Махфират Хидирзода, Раиси Кумитаи кор бо занон ва оила низ суханронӣ карда, аз таъсиси маҳфили донишҷӯёни дар хориҷи кишвар таҳсилдошта истиқбол намуд. Хидирзода изҳор дошт, ки ин маҳфил барои ба ҳам овардани ҷавонон дар хориҷ  нақши муҳим мебозад.

Дар идома гуфта шуд, ки дар замони муосир, ки таҳоҷуми фарҳангӣ хеле тезу тунд гардидааст, нигоҳ доштани ҳуввияти миллӣ вазифаи ҳар як ҷавон ба ҳисоб меравад.

Дар ин чорабинии тантанавӣ ва мулоқоти раиси Кумита, ки бахшида ба Рӯзи ҷавонон доир гардид, Фатҳиддин Солеҳов директори «Маркази ҷавонони шаҳри Душанбе» оид ба “Заминаҳои асосии зарурати таъсиси «Маҳфили донишҷӯёни дар хориҷи кишвар таҳсилдошта» сохтор, низоми ҳамкорӣ ва ҳамгироии фаъолияти он ба дигар ташкилотҳо” маъруза кард.

Инчунин дар мулоқот донишҷӯёни фаъоли тоҷик, ки дар донишгоҳҳои бонуфӯзи кишварҳои хориҷӣ таҳсил мекунанд, доир ба таҷриба ва шароиту мушкилоти таҳсил баромад карданд.

Ҳамин тавр Саидов Некқадам хатмкунандаи Донишгоҳи давлатии Астрахани ФР дар мавзӯи «Ҳаёти донишҷӯи дар хориҷи кишвар: бартарият ва мушкилоти он», донишҷӯи донишгоҳи давлатии Белорус Ёсаминбону Мусоева оид ба «Донишҷӯй ҳамчун ҷавони фаъол муаррифгари фарҳанг ва тамаддуни миллати тоҷик”, донишҷӯйи донишгоҳи Гаагаи Давлати Ҳоланд Аврангзеб Асрориён доир ба  «Нахустин қадамҳо ба ҳаёти донишҷӯи дар хориҷи кишвар» ва магистранти донишгоҳи Ҳансеои Ҷумҳурии Кореяи Ҷанубӣ Мирзоев Сиёвуш “Дӯстии донишҷуёни тоҷик омили муҳими пешрафт ва муаррифии миллат” маърӯза намуданд.

Дар поёни мулоқот миёни масъулин ва донишҷӯён, ки бештар аз 150 нафар буданд, суолу ҷавоб сурат гирифт.  Дар ин бора Наврӯз Қурбонов, Мутахассиси пешбари Бахши таҳлилу иттилооти Кумитаи ҷавонон, варзиш ва сайёҳӣ хабар дод. 

Намояндагони Вазорати мудофиаи  Афғонистон барои паррондани  ду снаряди  иштибоҳӣ ба хоки Тоҷикистон расман бахшиш пурсидаанд.

Ин ду снаряд аз сӯи нерӯҳои ҳукумати Афғонистон дар минтақаи Дарқади вилояти Тахор, ҳаммарзи ноҳияи Фархори Тоҷикистон ҳангоми ҳамла ба гурӯҳи Толибон як ҳафта пеш партоб шуд.

Як мақоми баландпояи Сарраёсати нерӯҳои марзбонии Кумитаи давлатии амнияти миллии Тоҷикистон гуфтааст,ки  “аз хоки Афғонистон ба Тоҷикистон аз силоҳи навъи миномёт ду маротиба наздик ба деҳаҳои наздимарзӣ парронда шуд, аммо аз он касе осеб надид.” Ӯ мегӯяд, дар ҳоле ки нерӯҳои марзбонии Тоҷикистон ба ҳамлаи ҷавобӣ омодагӣ мегирифтанд,  ҷониби Афғонистон иштибоҳ будани ин тирпарониро шарҳ дода, расман маъзарат хостааст.Ин аввалин тирпарронӣ аз он тарафи марз ба сӯи Тоҷикистон дар чанд соли ахир буд.

Имрўз Президенти Ҷумҳурии Тоҷикистон Эмомалӣ Раҳмон як катор кадрҳоеро, ки дар Сарраёсати Қўшунҳои сарҳадии Кумитаи давлатии амнияти миллии Ҷумҳурии Тоҷикистон ба вазифаҳои пурмасъулият таъин гардиданд, ба ҳузур пазируфт.

Ҳаминтариқ, Абдураҳмон Азимов - бо сабаби ба нафақа баромадан аз вазифаи Сардори Омўзишгоҳи олии сарҳадии Сарраёсати Қўшунҳои сарҳадӣ озод гардид.
Назиров Сафаралӣ аз вазифаи муовини Сардори Сарраёсати Қўшунҳои сарҳадии Кумитаи давлатии амнияти миллии Ҷумҳурии Тоҷикистон озод гардида, ба вазифаи Сардори Омўзишгоҳи олии сарҳадии Сарраёсати Қўшунҳои сарҳадии Кумитаи давлатии амнияти миллии Ҷумҳурии Тоҷикистон таъин гардид.

Ҷаъфарзода Муҳаммад Ҳайдар аз вазифаи муовини Сардори Сарраёсати Қўшунҳои сарҳадии Кумитаи давлатии амнияти миллии Ҷумҳурии Тоҷикистон оид ба корҳои тарбиявӣ-сардори раёсати корҳои тарбиявӣ озод гардида, Сардори раёсати Қўшунҳои сарҳадии Сарраёсати Қўшунҳои сарҳадии Кумитаи давлатии амнияти миллии Ҷумҳурии Тоҷикистон дар вилояти Суғд таъин гардид.
Ҳамчунин Сардорони раёсатҳои қўшунҳои сарҳадии Кумитаи давлатии амнияти миллии Ҷумҳурии Тоҷикистон дар Вилояти Мухтори Кўҳистони Бадахшон ва вилояти Хатлон таъин гардиданд.

Ба вазифаҳои сардорони отрядҳои сарҳадӣ ва нуқтаҳои дидбонгоҳҳои Сарраёсати қўшунҳои сарҳадии Кумитаи давлатии амнияти миллии Ҷумҳурии Тоҷикистон дар ноҳияҳои Мастчоҳ, Ғончӣ, Ашт ва Истаравшани вилояти Суғд афсарони соҳибтаҷрибаву корозмуда таъин карда шуданд.

Бо мақсади тақвияти мубориза бар зидди ҳамагуна зуҳуроти номатлуби имрўзаи ҷомеаи ҷаҳониро фарогирифта Сарфармондеҳи Олии Қувваҳои Мусаллаҳи Ҷумҳурии Тоҷикистон Эмомалӣ Раҳмон аз роҳбарони дидбонгоҳҳои сарҳадии Ишкошим, Шўрообод, Панҷ, ки тоза ба вазифаҳои пурмасъулият таъин гардиданд, талаб намуд, ки дар ҳифзи марзу буми Ватан ҳушёру зирак бошанд ва ҳар як ваҷаб хоки диёрро аз рўи садоқат ба давлату миллат ҳифз намоянд.

Роҳбарони марказҳои таълимии “Ҳалқаёр” ва “Лангар” низ аз ҳисоби афсарони ҷавону корозмуда таъин гардиданд. Қобили зикр аст, ки ҳамаи кадрҳое, ки имрўз ба вазифаҳои роҳбарӣ дар Сарраёсати Қўшунҳои сарҳадии Кумитаи давлатии амнияти миллии Ҷумҳурии Тоҷикистон таъин гардиданд, баъди хатми донишгоҳҳои мамлакат донишгоҳу донишкадаҳои соҳавиро дар хориҷи кишвар, аз ҷумла Федератсияи Россия ва Қазоқистон бо дарёфти дараҷаи баланди тахассусӣ хатм намудаанд. 

Президенти Ҷумҳурии Тоҷикистон Эмомалӣ Раҳмон аз авзои номўътадили давлати ҳамсояи Афғонистон, задухурду муқовимати гурўҳҳои ифротгаро ва террористӣ бо сохторҳои қудратии ин давлат дар наздикиҳои сарҳади Тоҷикистон ёдовар шуда, аз ҳар як роҳбари ниҳод бо қотеъият назорати шабонарўзӣ, таъмини амният ва осоиши мардумро талаб намуд.
Сарвари давлат Эмомалӣ Раҳмон таъкид намуд, ки дар баробари ташкили хуби таъминоти моддию техникии нигоҳубини сарҳад ба ташкили хоҷагиҳои ёрирасон, истифодаи мақсадноки заминҳои ҳудуди қисмҳои низомӣ ва корҳои ободонию ниҳолшинонӣ диққати махсус дода шавад.

Мақомоти корҳои дохилии Суғд аз боздошти ноиби фармондеҳи гуруҳи зудамал (СОБР)-и Раёсати мубориза бо ҷиноятҳои муташаккил дар ин вилоят хабар додаанд, ки дар куштор барои 1,5 ҳазор доллари амрикоӣ муттаҳам мешавад.

Ин ниҳод иттилоъ додааст, ҷасади корманди 25-солаи беморхонаи Суғд шаби 10 ба 11 август дар ҳудуди шаҳраки навбунёди Сайҳун аз сӯи ронандаҳои мошинҳои боркаш пайдо шудааст.Дар ҷасади ин сокини ноҳияи Айнӣ, ки муваққатан дар Хуҷанд зиндагӣ мекардааст, осори захмҳои зиёди корд ошкор гардидааст.

Дар натиҷаи чорабиниҳои фаврӣ баъди 3-4 соати дарёфти ҷасад айбдор дар ин ҷиноят - ноиби фармондеҳи гуруҳи зудамал дар Суғд, лейтенанти калони 40-сола боздошт шудааст.Ӯ изҳор доштааст,ки марҳум аз вай 1,5 ҳазор доллар қарздор буд ва надодани қарз боиси куштор шудааст.

Президенти Тоҷикистон, рӯзи 14 август дар Сарраёсати нерӯҳои марзбонии Кумитаи давлатии амнияти миллӣ тағйироти кадрӣ анҷом дод.

Бар асоси ин тағйирот, Абдураҳмон Азимов - сардори Омӯзишгоҳи олии сарҳадии Сарраёсати нерӯҳои марзбонӣ ба нафақа рафта, ба ҷойи ӯ Сафаралӣ Назиров таъин гардид. Вай то ин дам муовини сардори Сарраёсати Қӯшунҳои сарҳадии Кумитаи давлатии амнияти миллии Тоҷикистон буд. Муҳаммад Ҷаъфарзода аз вазифаи муовини сардори Сарраёсати Қӯшунҳои сарҳад оид ба корҳои тарбиявӣ озод шуда, сардори раёсати Қӯшунҳои сарҳадии Сарраёсати Қӯшунҳои сарҳадии Кумитаи давлатии амнияти миллӣ дар Суғд таъин гардидааст. Дафтари матбуоти президент мегӯяд, “инчунин, сардорони раёсатҳои қӯшунҳои сарҳадии Кумитаи давлатии амнияти миллии Тоҷикистон дар Бадахшон ва Хатлон низ таъин гардиданд. Ба иттилои манбаъ, президент «аз вазъи номӯътадили Афғонистон, задухӯрду муқовимати гурӯҳҳои ифротгаро ва экстремистӣ бо сохторҳои қудратии давлати Афғонистон дар наздикиҳои сарҳади Тоҷикистон ёдовар шуда, аз ҳар як роҳбари ниҳод бо қотеъият назорати шабонарӯзӣ, таъмини амният ва осоиши мардумро талаб намуд”.

Fatal error: Call to undefined method DateTime::setTimestamp() in /home/pressatj/domains/pressa.tj/public_html/sites/all/modules/nbt_currency_rates/nbt_currency_rates.module on line 27

Саидмаҳдихон Сатторов, маъруф бо лақаби “Шайх Темур”, ки аз сӯи суди  ноҳияи Синои Душанбе ба 16 сол зиндони низомаш сахт маҳкум шудааст, бо ирсоли як нома аз президент Эмомалӣ Раҳмон хостори кумак шудааст.

Мавлудҷон Салихов, адвокати Саидмаҳдихон Сатторов мегӯяд, инчунин, шикояти кассатсионии нафари таҳтия ҳимояташ ба суди таҷдиди назар пешниҳод шудааст. Салихов мегӯяд, “Шайх Темур” аз президенти Тоҷикистон хоҳиш кардааст, ки ҳадди ақалл барои кам кардани муҳлати ҷазояш дар зиндон мусоидат намояд. “Ӯ аз тамоми моддаҳое, ки бар асоси онҳо маҳкум шудааст, танҳо ҷурми бисёрзаниро ба гардан мегирад ва нисбат ба айбҳои дигар, ба монанди “монеъ шудан ба таҳсили фарзандон ва ишғоли худсаронаи замин ва тамаъҷӯӣ мегӯяд, ки гунаҳкор нест ва бо туҳмати бардурӯғи шоҳидон маҳкум шудааст,” – афзуд адвокат

Вазорати корҳои  дохилаи Тоҷикистон гуфтааст, ки  ба Русия дархости истирдоди 7 шаҳрвандашро ирсол кардааст, ки дар чанд моҳи охир дар қаламрави ин кишвар боздошт шудаанд. Масъулин мегӯянд, ки умедворанд, ки  Русия дархости онҳоро иҷро ва боздоштшудаҳоро ба Тоҷикистон истирдод мекунад. Бинобар маълумоти расмӣ, дар чанд моҳи гузашта ҳудудан 10 узви ин гурӯҳи мухолифи ҳукумати Тоҷикистон дар қаламрави Русия боздошт шуданд. Маскав се тани онҳоро ба Тоҷикистон фиристод ва додгоҳҳо онҳоро ба солҳои тӯлонӣ маҳкум ба зиндон карданд.  Яке аз қазияҳои ахир марбут ба Мақсуд Иброҳимов, як фаъоли созмони мухолифи ҳукумат бо номи «Ҷавонон барои эҳёи Тоҷикистон» аст, ки моҳи июни соли равон ба 17 соли зиндон маҳкум шуд. Худи ӯ ва тарафдоронаш ин ҳукмро ноодилона мехонанд. Бино бар маълумоти дарёфтӣ, яке аз боздоштшудаҳо Абдураҳим Восиев, сокини ноҳияи Қубодиён аст, ки бо ҷурми ҳамкорӣ  бо “Гурӯҳи 24” 9 моҳи охир дар як боздоштгоҳи  шаҳри Маскав ба сар мебарад. Мақомоти Тоҷикистон ин шаҳрвандро бар асоси Кодекси ҷиноии Тоҷикистон  ба ташкили созмони экстремистӣ муттаҳам мекунанд.

Прокуратураи  Тоҷикистон аз як ҷинояти мудҳиш дар яке аз деҳаҳои ноҳияи Мастчоҳ хабар дод.

Прокуратура  дирӯз  дар вебсайти худ навишт, ки як ҷавони 23-солаи сокини деҳаи Устунги ноҳия рӯзи 16-уми август бинобар хусумати шахсӣ ва “аз сабаби муносибатҳои оштинопазир доштан"бо хонаводаи хоҳари 22 солааш Ғиёсзода Марҳабои Гиёҳ ӯ ва шавҳари 25-солааш Насриддин Ғафуровро бо силоҳи шикорӣ паррондааст. . Ин ҷавон  силоҳи мазкурро ғайриқонунӣ нигаҳ медоштааст. Номи ин ҷавонро ошкор накардаанд ва гуфтаанд, ки прокуратураи  Мастчоҳ нисбати ӯ бо банди куштори Кодекси ҷиноӣ парвандаи ҷиноӣ боз кардааст.

Вазорати корҳои  дохилии Тоҷикистон  аз ҷарима шудани ҳаҷвнигори шинохта - Холмурод Сидиқов хабар додааст.

Тибқи иттилои дафтари матбуоти ин ниҳод Холмурод  барои нақзи қоидаҳои ҳаракат дар шаҳри Душанбе беш аз 9 ҳазор сомонӣ ҷарима шудааст: “Сидиқов дар умум 22 бор қоидаҳои ҳаракат дар роҳҳои пойтахтро нақз кардааст, ки маблағи ҷаримаи онҳо 9 ҳазору 700 сомониро ташкил медиҳад”.

Манбаъ инчунин Холмурод Сидиқовро дар идора кардани воситаи нақлиёти сиёҳшиша бидуни иҷозаи расмӣ айбдор кардааст. Ба қавли масъулини ВУД, санаи 15 августи соли равон дар хиёбони Рӯдакии пойтахт автомашинаи тамғаи “Ниссан-Максима”, аломати қайди давлатиаш АХ 7272 РТ 01 таҳти идораи Сидиқов Холмурод боз дошта шудааст:“Зимни санҷиш ва тафтиши ҳуҷҷатҳо муайян гардид, ки иҷозатномаи сиёҳшишаи воситаи нақлиёти ронандаи номбурда мӯҳлаташ соли 2013 гузаштааст”. 

Холмурод Сидиқов аз ҳаҷвнигорони шинохтаи тоҷик буда, бо барномаи "Лаҳзаҳои гуворо"миёни мардум маъруф аст.Инчунин, масъулини Вазорати корҳои дохилии Тоҷикистон аз ҷарима шудани Ҳукумов Асрор Нуруллоевич ба маблағи беш аз 14 ҳазор сомонӣ хабар доданд.

Тибқи иттилои дафтари матбуоти ВУД, Ҳукумов, соҳиби мошини “БМВ-523” давоми тақрибан як сол 53 бор қоидаи ҳаракат дар роҳро нақз кардааст, ки аз сӯи дурбинҳои назоратии “Шаҳри бехатар” сабт шудаанд.

Варзоб  яке аз минтақаи калидии сайёҳии Тоҷикистон шинохта шуда, ҳамарӯза меҳмонони зиёди дохил ва хориҷи кишвар аз ин мавзеъ дидан мекунанд. Савзаалӣ Назирзода, ҳамагӣ чанд моҳ пеш Раиси ноҳияи Варзоб таъин шудааст. Ӯ баъди қабули шаҳрвандон розӣ шуд, то ба чанд саволи “Тоҷикистон” вобаста ба  фаъолияти мақомоти ноҳия, мушкилоти нарасидани замини наздиҳавлигӣ,  туризм ва ғайра ҷавоб гӯяд.

-Муҳтарам Назирзода, Шумо раиси тозатаъин ҳастед. Мехостем донем, ки корро аз чӣ оғоз кардед ва барои беҳтар намудани шароити туризм ва ҷалби сайёҳони хориҷӣ ба ноҳияи Варзоб чӣ корҳо анҷом расонида мешаванд?

-Якум, ман кадри пойтахт ҳастам ва солҳои зиёд дар вазифаҳои пурмасъулият дар шаҳри Душанбе кору фаъолият доштам.  Бинобар ин, барои аз наздик шинос шудан бо мардуми ноҳия вохӯриро оғоз кардам. Тамоми деҳоту ҷамоатҳо  рафта, аз мушкилоти мардум пурсон шуда, арзи дилашонро гӯш кардам ва таклифу пешниҳодҳои зиёдеро дар худ навишта кардаам ва пайи амалишавии онҳо  камари ҳиммат бастаам.

Дуюм, қаблан масъулияти ободонии шаҳри Душанбе, махсусан, таъмини  Тоҷикистон бо гулу дарахтони  сояафкан ва ҳамешасабз ба дӯши ман вогузор шуда буд. Аз ҷумла, ободу сарсабз намудани “Боғи Парчами миллӣ”-и пойтахт ва “Қасри миллат” ба дӯши мо гузошта шуда буд. Ҳоло кӯшиши мо  ба ободонии ноҳияи Варзоб равона гардидааст.Чун ин ҷо мавзеи муҳими сайёҳӣ маҳсуб меёбад,тасмим гирифтаем, ки  тамоми иншоотҳои истироҳатии ноҳияро бо ҷалби сармояи дохилӣ фаъол гардонида, шароити будубош ва истироҳатро барои меҳмонон муҳайё созем. Аллакай мавзеи истироҳатии “Кохи Малика” ва чандин меҳмонхонаҳои замонавии дигар дар минтақаи истироҳатии Гулобод  мавриди истифода қарор дода шуданд. Ин ҷо барои гузаронидани чорабиниҳои дохилию байналмилалӣ, конфронсҳо ва истироҳат шароити мусоид фароҳам мебошад. Инчунин, истироҳатгоҳњои “Хоҷа Оби Гарм”ва “Сароб” аз нав таъмир карда шуданд. Чанде қабл гурӯҳи меҳмононро аз Ҷумҳурии Туркманистон ва варзишгароне, ки дар марафони вилояти Суғд ширкат карданд, ба “Хоҷа Оби Гарм” ташриф оварданд. Ин оѓози кор аст.Корҳои созандагиву бунёдкориро дар Варзоб якҷоя бо мардуми ноҳия боз њам ривољ доданием.

-Айни замон миқдори мавзеъҳои истироҳатӣ дар ноҳияи Варзоб чӣ қадар аст?

- Дар ноҳия 920 минтақаи истироҳатӣ мавҷуд буда, аз ин 47-50 тоаш истироҳатгоҳҳои оммавист, дар ин ҷо меҳмонони дохил ва хориҷӣ қабул карда мешаванд. “Кохи Малика”, ки бо тарзи меъмории замонавӣ сохта шуда, чанде қабл мавриди истифода қарор гирифт, аз ҷумлаи онҳост. Ин ҷо тамоми шароити истироҳатӣ фароҳам оварда шудааст. Ҳамчунин, ногуфта намонад, ки бештари минтақаҳои истироҳатии дар Варзоббуда хусусӣ мебошанд.  

-Таҳлилгарон нақши ВАО, махсусан телевизион, матбуот ва интернетро дар ҷалби бештари сайёҳон ба мавзеъҳои истироҳатӣ муассир медонанд. Мутаассифона, мушоҳидаҳо нишон медиҳанд, ки таблиғу ташвиқи Варзоб камтар аст. Оё мақомоти иҷроияи ноҳияи Варзоб сомонаи худро дорад, ки  он ҷо дар бораи мавзеъҳои истироҳатӣ маълумоти лозимӣ ҷой дода шуда бошанд?

-Вақте ман ба ҳайси раиси ноҳия фаъолиятро оғоз кардам, аввалин масъалае, ки гузоштам, фаъол гардонидани сомонаи мақомоти ноҳия буд. Айни замон бо ҷалби мутахассисони соҳа маълумотномаҳо гирдоварӣ шуда, нияти фаъол намудани сомонаи махсуси мақомоти ноҳияи Варзобро дорем. Ҳамзамон, мақсад дорем, ки дар мақомоти ноҳияи Варзоб шуъбаи махсуси сайёҳӣ фаъол карда шавад. Мушкилоти дигар ҳам дорем.  Аксарияти минтақаҳои истироҳатӣ дар тавозуни мақомоти давлатӣ қарор доранд. Яъне, соҳибмулк мо нестем. Аз пеши худ ҳам таблиғу  ташвиқи истироҳатгоҳҳои ноҳияро надорем. Агар онҳоро таблиғ кунем, шояд онҳо омодаи қабули меҳмонон набошанд. Масалан, мавзеи истироҳатӣ- варзишии “Сафедорак” дар тобеияти Кумитаи ҷавонон, варзиш ва сайёҳӣ, осоишгоҳи “Хоҷа Оби  Гарм” дар тавозуни Дастгоҳи иҷроияи Президенти Тоҷикистон қарор дорад. Кори таблиғотиро танҳо мақомоти ноҳияи Варзоб анҷом дода наметавонад, дар ин ҷо ҳамоҳангии тамоми сохторҳои марбутаро  лозим медонем.

-Ҳамасола дарахтони зиёди сояафкану ҳамешасабз дар шоҳроҳ ва даромадгоҳи мақомоти ноҳия шинонида мешавад. Чаро бештарашон мехушканд?

Ман то ҳол дарахтони хушкшударо надидаам. Аммо имсол нисбат ба  соли гузашта ҳаво гармтар омад. Табиист, ки баъзеи дарахтон баргашон хушк шуданд, вале танаашон об доранд, умеди дубора сабзонидан ҳаст.  

-Сокинони мавзеи Зоғар аз набудани об шикоят доранд. Онҳо баъди таъин шудани Шумо ба ҳайси раиси ноҳия дар ин бора муроҷиат ҳам карда будаанд. Аз мушкилоти онҳо хабар доред?

-Бале, ғайр аз қабули шаҳрвандон дар мақомоти ноҳия, боз ба ҷамоат ва деҳотҳо рафта, бо мардум вохӯрӣ анҷом медиҳам. Қариб бо сад нафар истиқоматкунандагони мавзеи Зоғар суҳбат доштам. Барои баровардани об ба мавзеи Зоғар гурӯҳи корӣ таъсис додаем. Масофаи баровардани об 4 километрро ташкил медиҳад, ки ин ниҳоят мушкил аст. Замини қубургузар сангзор аст. Ҳисоб карда баромадем, маблағи калон сарф мешавад. Аз  деҳае, ки қубури об бояд гузарад,  аллакай сокинонаш байни худ нофаҳмӣ доранд.   Баъди омӯзиш бо мутахассисон, ба хулосае расидем, ки чоҳи амудӣ канда, мардуми Зоғарро бо  оби зеризаминӣ таъмин созем. Бинобар набудани имкониятҳои  молиявӣ, инро  то соли оянда ба таъхир гузоштаем.  

- Дар ноҳияи Варзоб корхонаҳо фаъолият доранд? Умуман, рушди саноат дар кадом ҳолат қарор дорад?

-Дар ноҳия корхонаҳо қариб фаъолият надоранд гӯем, хато намешавад. Ҳамагӣ 3 корхонаи саноатӣ дорем, ки он ҳам мавсимист. Ин  корхонаҳо ба коркарди ангишт, сементбарорӣ ва қуму шағал машғуланд. Қарзи бақияи андоз ҳам аз ҳисоби ҳамин корхонаҳост.

-Пас, буҷети ноҳия аз кадом ҳисоб пур карда мешавад?

-Ноҳияи мо аз ҳисоби давлат маблағгузорӣ мешавад. Сарчашмаҳои дигари даромад ҳам дорем. Ин қисман аз ҳисоби мағозаҳо, соҳибкорони инфиродӣ ва истироҳатгоҳҳост.

-Азим Иброҳим, муовини Сарвазир дар  ҷаласае изҳор доштааст, ки дар асоси нишондиҳандаҳои Паёми Президенти Ҷумҳурии Тоҷикистон дар тамоми шаҳру ноҳияҳои мамлакат  бунёди  корхона ва коргоҳҳои  хурди  коркарди  шир  пешбинӣ шудааст. Таҳлилҳо нишон додаанд, ки дар ҳудуди 17 шаҳру ноҳияи тобеи ҷумҳурӣ 17 корхонаи коркарди шир фаъолият менамояд, ки аз ин шумора  13-тои он ба шаҳри Душанбе ва ноҳияҳои атроф рост меояд. Мутаассифона, то имрӯз дар ноҳияи  Варзоб  вобаста ба иҷрои нишондиҳандаҳои Паёми Сарвари давлат нақшаҳои амал таҳрезӣ нагардидаанд. Сабаб чист?

-Албатта, аввал барои бунёди корхонаи коркарди шир замина лозим аст. Ин маънои онро надорад, ки ноҳияи мо дар атрофи пойтахт ҷойгир асту ин гуна корхонаро бунёд намоем. Тасаввур кунед, ки корхонаро сохтем, маҳсулоти хомро аз куҷо мегирем? Дар мо фермаҳои  чорводорӣ нест.  Варзоб куҳистон - қариб 6 моҳ барф хоб аст. Барои истеҳсоли шир бояд хӯроки чорворо таъмин кард. Заминҳои корам надорем. Мардум  каму беш шир истеҳсол мекунанд, вале шахсист, ба бозорҳои атрофи ноҳияи Варзоб  ва  пойтахт бурда мефурӯшанд.

-Мегуфтед, ки чӣ қадар  замини наздиҳавлигӣ ба аҳолии ноҳия  тақсим шудааст?

-5 ҳазор нафар барои гирифтани замини наздиҳавлигӣ бо ариза муроҷиат кардаанд, ки 1300 нафарашон бо қитъаи замин таъмин шудаанд. Эҳтиёҷмандони  қитъаи замин дар ноҳия зиёд, аммо замин кам аст. Аҳолии ноҳия ҳамасола рӯ ба афзоиш дорад.  Азбаски Варзоб минтақаи сайёҳист, имконияти васеъ кардани замин нест. Бинобар ин,  мо ба Ҳукумати Ҷумҳурии Тоҷикистон пешниҳод кардем, ки минбаъд аҳолии ноҳияро аз дигар ноҳияҳо- Рӯдакӣ, Данғара, Қубодиён ва ғайра бо замин таъмин кунанд. Илоҷи дигаре  нест. 

-Аксарияти аҳолии ноҳия ба кадом корҳо машғуланд?

- Варзоб зиёда аз 80 ҳазор аҳолӣ дорад. Бештари мардум ба соҳибкорӣ, боғдорӣ ва қисми дигар дар муҳоҷирати меҳнатианд.

- Имрӯз пайвастани ҷавонон, махсусан занҳо ба гурӯҳҳои тундрав, рафтани онҳо ба ДИИШ боиси нигаронист.  Ҳоло аз  ноҳияи Варзоб чанд нафар ба Сурия рафтаанд?

-Дуруст мегӯед, ки пайвастани ҷавонон, аз ҷумла, бонувон моро, ҳам ба ташвиш меорад. Дар ноҳияи Варзоб низ ин ҳолат ба қайд гирифта шудааст. Полковник  Гулмурод Ҳалимов, аз ҷамоати Чорбоғи ноҳия аз қабили онҳост. Умуман, дар ноҳия 5 нафар ба “Давлати исломӣ” ба   Сурия рафтаанд, ки ягонтои онҳо барнагаштаанд.

-Аз хонаводаи полковники фирорӣ Гулмурод Ҳалимов  дидан кардаед, аҳволашон чӣ гуна аст? Аҳли оилаи ӯ чї њол доранд? Мардуми ноҳия нисбати полковник чӣ  мегўянд?

- Баъди шунидани ин ҳодиса мо бо сокинони деҳаи Дараифонӣ,  ҷамоати доҳоти Чорбоғ дар якҷоягӣ бо намояндагони мақомоти ҳифзи ҳуқуқ вохӯрӣ доштем. Яке аз бародарони полковник, ки директори мактаб будааст ва хешу таборон иштирок доштанд. Ҳама аз ноҷавонмардии полковник ҳарф заданд. Наход, давлату Ҳукумати Тоҷикистон тамоми шароит ва имтиёзҳои давлатиро барои Ҳалимов муҳайё созаду боз ба ин амал даст занад? Дар ҳайратанд, ки чӣ гуна як шахси соҳибмаълумот ба ин роҳи нангин рафт. Ҳатто, падари полковник, ки ба синни 90 мерасад,  фарзандашро хоини Ватан номид. Нону хоки Тоҷикистон ӯро кӯр мекунад. Намак хӯрда дар намакдон туф кардан номардист..  

-Варзишро қосиди сулҳ меноманд. Барои оммавӣ гардонидани варзиш Шумо чӣ корҳоро ба анҷом мерасонед? Ҳамчунин, чанд варзишгарони ноҳияро ном мебурдед, ки дар сатҳи ҷумҳурӣ ва берун аз он шинохта шудаанд.

-Мо дар ҳама риштаҳои варзиш чеҳраҳои намоён дорем. Онҳо дар мусобиқаҳои дохилӣ ва байналмилалӣ  баромад карда, соҳиби ҷойҳои намоён мешаванд. Бояд қайд намоям, ки дар ноҳия ягона мактаби лижаронӣ ҳаст, имсол дар чемпионати ҷаҳон дар лижаронӣ варзишгарони мо ҳам иштирок дошта, сазовори ҷой шуданд. Ҳамчунин, Ҳомид Мирзоев ном сокини ноҳия, ки ҳоло дар Русия иқомат дорад, командаи футболи “Варзоб”-ро ташкил намудааст. Командаи “Варзоб” дар чандин бозиҳои футбол иштирок намуда, сазовори ҷойҳои ифтихорӣ гардиданд.

-Ҳамчун раис, рушди минбаъдаи ноҳияро дар чӣ мебинед?

-Ноҳия инъикосгари Тоҷикистон аст. Агар бо гирифтани номи Тоҷикистон Эмомалӣ Раҳмон гӯянд, бо гирифтани номи Душанбе Варзоб ба ёди ҷаҳониён меояд. То ин замон нақшаи кулли ноҳия набуд. Мо инро тайёр карда истодаем ва то соли охир ба Президенти мамлакат пешниҳод менамоям. Дар он ҷо шакли шаҳрсозӣ дар куҳ аст, ки фарогири 100 га замин мебошад. Ин таҷриба дар дигар давлатҳо, махсусан Туркия, Кавказ ҳам ҷой дорад. Мо дар ин хусус тамоми хулосаҳои вазорату идораҳои дахлдорро гирифтем. Замин ҳам барои сохтани ин гуна иншоотҳои баландошёна тобовар мебошад. Албатта, ин аз ҳисоби маблағи соҳибкорон бунёд меёбад. Аллакай соҳибкорон ба ин таваҷҷуҳ зоҳир карда истодаанд.

Мусоҳиб: Усмон Раҳимзода,

Суратгир: Дидор Саъдуллоев

Зиндагиномаи як зани тоҷик, ки аз Сурия, аз доми ДИИШ фирор кардааст

Бисёр душвор аст, вақте ки дар наздат як зани тоҷик бо чашмони  хунгирифта , рӯю  мӯйи парешон мебарояду дар бораи корнамоиҳояш дар ҷангҳои Суриву Ироқу Шом ҳарф мезанад. Ман ҳеҷ гоҳ  он эҳсосе, ки ҳозир дорам, надоштам. Билохира аз кӯчаҳои танги маҳаллаи “Кӯҳдоман” гузашта ба суроғаи зарурӣ наздик мешавем. Ҳа, шояд суоле сар занад, ки чаро ба “СИЗО” ё шӯъба не? Чун ин суол аввал зеҳни маро низ машкук карда буд. Бо амри Сарвари давлат, ба моддаи 401-и кодекси ҷиноӣ Замима (1) ворид шуда онҳое ки аз амалиётҳои ҷангӣ дар воҳидҳои давлатҳои дигар ихтиёрӣ даст мекашанд, аз ҷавобгапрӣ озод карда мешаванд...

Дар назди дарвоза  марди ҳалиме моро  пешвоз мегирад ва   ба хона шармгине салом гуфта, вориди хона шуд. Ман ҳайрон шудам, ки чунин як духтари орому мулоим ва шармгину ҳалим, чӣ гуна тавониста  ба "ҷиҳод"равад? Ё ӯро бурдаанд? Фиребаш доданд? Аз ӯ мепурсам:

-Ному насабатон?

-Ҷамолбӣ Ҳамидова.

- Биёед шурӯъ мекунем варақ гардонидани дафтари хотироти Шуморо. Қиссаи чӣ хел ва бо кадом восита ба ҷангҳои Сурияву Шом рафтанатонро нақл кунед, ман гӯш мекунам...

-Ҳамаашро? Аз аввал? Бисёр аст…

-Ҳеҷ гап не...

-Соли 2008 бо Шариф ном ҷавоне оиладор шудем. Шавҳарам соли чоруми хонадориамон ба муҳоҷират рафт.  Он вақт ман барои фарзанддоршавӣ табобат мегирифтам. Баъди се моҳи рафтанаш маро ба наздаш даъват кард ва ман чипта харида,  Краснадар рафтам. Ӯ дар сохтмон кор мекард, маоши нағз мегирифт, ба иҷорапулӣ, хурду хӯрокамон мерасид, илова бар ин, ба Тоҷикистон пул мефиристод. Ҳамин тавр, як сол сипарӣ шуд. Як рӯз тариқи барномаи «Новости» ҷангҳои Сурияро нишон доданд. Ёдам ҳаст, ки тайёраҳо бомба мепартофтанд, дуду чангу хок ба осмон мепечид…

  Шавҳарам ба ман нигоҳ карда гуфт, ки ман ҳамин ҷо меравам «Замини Шом». Ман бо ӯ ҷангҷол кардам, ки мо ин ҷо ба нияти кор карда, хонахарӣ омадем, на ҷангравӣ… Ҳамин тавр чанд рӯз гузашт.  Шариф ба ман гуфт, ки дар Истамбул ҷойи кори нағз пайдо кардаасту он ҷо меравад, баъдан, ки ҷо ба ҷо шуд, маро мебарад. Баъди як моҳи ӯ ман ҳам рафтам. Ӯ маро дар фурудгоҳ пешвоз гирифту мо аз он ҷо ба автовокзал рафта,  ба  автобус нишастем. Сафарамон тӯлонӣ буд...

-Шавҳаратон ба Шумо гуфт, ки куҷо меравед?

-Не, ман пурсидам, ки куҷо меравем, ӯ фақат мегуфт: «Дам назан!. Даматро гир»… баъди як шабонарӯз аз автобус пиёда шудему моро   як ҷавони араб дар қарибии сарҳад  пешвоз гирифт ва амр кард, ки бояд давем ва мо ҳам ба амраш итоат кардем. Ман сахт тарсидам, мо хело давидем, аммо ба ман касе чизе намегӯяд, дар сарҳад як ҷӯй ё хандақ ҳаст, аз он ҷо паридем, медонед ман ончунон тарсида будам, ки заминро ҳис намекардам… ва аввалин садои тирро шунидам…  Уффф, медонед, чӣ ҷойи шарм аз тарс тар кардам…  Дар як ҷо истодем, гӯё ки расидем. Дашти васеъ ва талу теппаҳои зайтунзор намудор буданд. Моҳи Рамазон буд. Ин дам шавҳарам хандакунон гуфт: 

-Ин замин «Замини Шом», замини муқаддас! Ба ҳар кас насиб намекунад, ба ин ҷо омадан. Ту бояд шукр кунӣ, ки ин ҷо омадӣ.    Ман чизе намегуфтам. Ду- се нафари дигар омада, моро гирифтанд ва ба як хонаи чорошёна бурданд, ки он ҷо  ду акаву додар бо дутоӣ занҳояшон мезистанд. Мо он ҷо як ҳафта истодем.

-Шумо фаҳмидед, ки ҷиҳод омадед?

-Не, ибтидо ӯ ба ман чизе намегуфт. Шаб хоб меравем, самолётҳо бомба мепартоянд, аз ҳар тараф тир мепаррониданд. Арабҳо бо кӯдаконашон доду фарёд мекунанд. Фаҳмидам, ки мо дар куҷо ҳастем. Хонаи дигар кӯчида, се моҳ зистем ва аз он ҷо ба Анҷара ном макон, кӯч бастем. Дар Анҷара шавҳарам як рӯз баромада рафта, як моҳ наомад. Баъди як моҳ пайдо шуд, ки тамоми баданаш ярадор, шикамаш духтагӣ, кукҳои калон –калон, маълум, ки духтури касбӣ надӯхтааст, аҳволаш бад. Баъде, ки Шариф ярадор шуд, моро ба Кафарҳама бурданду дигар на кӯмак карданд, на пул доданд, ҳатто духтур намефиристоданд, ягон намуди доруворӣ надоданд. Шуш ва умуман узвҳои даруниаш варам карданд, нафасаш мегирифт. Баъди якуним моҳ сиҳат ёфт, нимкола шуд. Диданд, ки сиҳат ёфт, боз омада бурдандаш. 9 декабр, -овоз дар гулӯйи Ҷамолбӣ гиреҳ мехӯрад, нафасгириаш тез шуда, мехоҳад фарёд занад, аммо аз ман шарм медорад, ки худашро ба даст гирифта, идома медиҳад,- 9 декабр, ду нафар  омада гуфтанд, ки шавҳарат шаҳид шуд. Бо телефон расмашро нишон доданд,  даҳонаш кушода, чашмонаш кушодагӣ. Дасту почаам суст шуд!  Ҳамсояҳо рафта меомаданд, хӯрок меоварданд, гириста мешиштам. Чӣ ҳам аз дасти ман меомад?

-Вақте ки шавҳаратон ҷароҳат набардошта буд, ҳар саҳар рафта бегоҳ меомад? 

-Не, не аввалҳо панҷрӯзӣ мерафт. Як рӯзи истироҳат дошт. Баъдан даҳрӯза шуд. Охирон як моҳ рафту омад, ки ярадор. Вақте ярадор шуду партофтандаш, худаш пушаймон шуд. Гуфт, ки ман фиреб хӯрдам, кори нодуруст кардам. Ба фиребашон дода шуда, турову худамро дар азоб мондам. Маро бубахш…

-Шумо дар вақти набудани шавҳаратон чӣ кор мекардед?

-Хона менишастам, тарсида. Кори хона мекардам.

-Занҳои тоҷик ҳам он ҷо буданд?

-Не, ман во нахӯрдаам. Бо занҳои араб як ҷо будем. Шавҳарҳояшон бо ҳукумати Башшор Асад ҷанг мекарданд.

-Тақдиратон баъди марги шавҳар чӣ гуна сурат гирифт?

-Баъди як ҳафта як зан бо шавҳараш маро гирифта хонаашон бурд. Гуфтанд, ки ту моли “Давлати исломӣ”  ҳастӣ, шавҳарат медиҳем. Ман илтиҷо кардам, зора кардам, ки шавҳар намехоҳаму маро аз сарҳад гузаронанд. Онҳо розӣ шуданд. Вақти гузаштан аз сарҳад азоб кашидам. Гузаштанамон қариб як моҳ тӯл кашид.

-Танҳо будед?

-Не, ҳамроҳам як занаки чечен, як турк, як доғистонӣ ва чанд ҷавони араб. Истамбул омадем. Чечензан дар Истамбул хонаи иҷора доштааст. Турк хонааш рафт, араб бозгашт ману доғистонӣ ва чечену ду кӯдакаш он ҷо мондем. Баъдан хонаи як озарбойҷонӣ рафта зиндагӣ кардем.

-Шуморо кӣ ин тараф он тараф мебурд? Мардҳои араб ё турк?

-Дар Истамбул бо занҳо будем, мардҳоро надидаам, дар Сурия буданд.

-Не Туркияро дар назар дорам, кӣ маблағи иҷора медод, кӣ хӯрока мехарид?

-Занаки чечен меовард, мехарид. Як моҳ он ҷо зиндагӣ кардам ва баъдан билет гирифта, паридам Краснадар.

-Аз куҷо пул пайдо кардед, барои чиптахарӣ?

-Ба як дугонам телефон кардам, билети электронӣ харид то Краснадар.

-Дугонаатон тоҷик буд?

-Не, рус! Маро пешвоз гирифт, хонаи вай рафта зиндагӣ кардем. Фикр кардам, ки  се моҳ истода ақаллан роҳкиро кор карда, Тоҷикистон меоям, аммо ӯ маро ба гап андохтанӣ мешуд, ки исто куҷо меравӣ, дар   Тоҷикистон чӣ кор мекунӣ. Ба гапи онҳо гӯш кардам ва он ҷо истодам.  Ӯ кор мекард, ман кӯдакашро нигоҳ мекардам. Онҳо маро насиҳат  кардан гирифтанд, ки ҷавон ҳастиву шавҳар кун! Кӯдакдор мешавӣ ва ман розӣ шудам. Онҳо марди доғистониеро оварданд ва ман дуюмбора бо ӯ хонадор шудам. Уфф... ба хотири он ки кӯдакдор шавам.

-Он марди доғистонӣ ҷавон буд?

-Чилсола буд. Ман ибтидо ӯро дидам,  марди хуб буд, арақхӯр не, сигоркаш не, одами нағз буд аввал. Ибтидо шавҳар карданӣ  набудам, аммо онҳо маро «угаварит» карданд…

-Ҳамон дугонаи русатон «угаварит» кард?

-Ҳа, ҳамон.

-Дугонаатон мусулмон буд ё насронӣ?

-Мусулмон.

-Номи шавҳари доғистониатон  чӣ буд?

-Элман.

-Ӯ пеш зан дошт?

-Ҳа, занаш либосҳои диниро (сатру  ҳиҷобро) қабул накардааст, бо ду кӯдак ҷавоби ӯро  додаст. Баъди никоҳ зиндагиамон нағз буд. Ду моҳ дар Краснадар истодем. Акаи шавҳарам дар Анталияи Туркия зиндагӣ мекард. Ӯ  чанд бор моро даъват кард, то он ҷо равем. Шавҳарам розӣ шуд. Тариқи Истамбул  ба Анталия рафта, як моҳ дар хонаи акаи шавҳарам истодем. Баъдан хона иҷора гирифтем,   шавҳарам кор ёфт.

Ахирон ӯ ҳам гӯё девона шуд. Як рӯз гуфт, ки Сурия меравем. Ман ӯро илтиҷо кардам, гуфтамаш, ки ман он ҷо будам, туро мекушанд, ҳоли  ман чӣ мешавад. Аммо ӯ ба гапи худаш меистод. Мегуфт: 

 - Ман  шавҳар, ту зан! Ман туро хоҳиш не, амр медиҳам!

-Ӯ маро тарсонд, ки  агар наравам, ҷавобамро медиҳад. Ба ғазаби Худо гирифтор мешавӣ, Худованд ҳам дар ин дунё, ҳам дар он дунё азобат медиҳад, месӯзӣ, мегуфт ӯ. Билохира рафтем. Аз Анталия боз Истамбул,  аз он ҷо боз ба автобус нишаста, роҳакӣ шудем...

-Боз ба ҳамон роҳи пештара?

-Ҳа, аммо ин даъфа роҳи Газантепро пеш гирифтем.  Қарор буд, ки дар он ҷо, дар меҳмонхона зиндагӣ мекунем. Вақте ба Газантеп расидем, аз автобус фаромадан баробар моро полиси турк манъ кард ва барои тафтиши ҳуҷҷат ба шуъба бурданду ба хонаҳои алоҳида: маро назди занҳо шавҳарамро назди мардон ҷой карданд. Дар он ҳуҷра занҳои зиёде аз Саудия, Сурияву Доғистон буд. Моро ҳангоми бозпурсӣ суол карданд, ки куҷо меравӣ, Маскав ё Душанбе? Дар наздам ду роҳ буд: агар Тоҷикистонро интихоб мекардам, аз шавҳарам ҷудо мешудам, агар Русияро интихоб мекардам, боз ҳамон тақдир такрор мешуд. Ман каме фикр карда, гуфтам, ки Тоҷикистон.

-Бо Элмус, яъне бо шавҳаратон чӣ шуд?

-Вай он ҷо монду  маро тариқи тайёраи  Газантеп- Истмабул-Душанбе ин ҷо оварданд.

-Ҳамин тавр даъфаи дуввум ба Сурия нарасидед?

-Худоро шукр, ки нарасидам!

-Ман суханҳои шуморо гӯш кардам, аммо ман ба як чиз ҳамеша дар ҳайрат мемонам, ки шавҳарони Шуморо ҳамонҳо чӣ гуфта мебаранд, биҳишт ё пул ?

-Шариф ба ман чизе нагуфт, аммо шавҳари дуюмам мегуфт, ки он ҷо замини бобаракат ва муқаддас аст. Аммо ман дидам, ки он ҷо ҳеҷ муқаддасоте нест, баракате надорад, об нест, нонро ба серӣ намехӯрдем, гуруснагиву ташнагӣ мекашидем, дар хона тарсидаву ларзида менишастем. Аммо Элмус маро гӯш намекард,  мегуфт, ки замини бобаракат ва дорои  шароити хуб…

-Бисёриҳо мегӯянд, ки “Давлати исломӣ”  мардумро бо додани маблағҳои ҳангуфт ба доми худ медароранд. Шумо мегуфтед, ки ба Шариф  чӣ қадар маблағ медоданд. 1000, 2000 доллар?

-Не, аз куҷо? Аз ибтидои рафтанамон 100 долларӣ барои хӯрока медоданд, ки ҳатто ба картошкаву пиёз намерасид.

-Шумо ба мардум, ба он ҷавононе, ки дар сар фикри ба ном "ҷиҳод"рафтан доранд, чӣ гуфтанӣ ҳастед?

-Он ҷо наравед! Он ҷо ҷуз зӯроварӣ, даҳшат, одамкушӣ  ҳеҷ чизи дигаре нест! Ҳатто оби хӯрдан надорад, гуруснагӣ, ташнагӣ, ҷанг. Пулу хона медиҳем гуфта, фиреб мекунанд, ҳамааш дурӯғ аст!  Тоҷикистони  мо биҳишт аст, обаш, ҳавояш, ҳама чизаш...

-Вақте Шумо омадед ё аниқтараш Шуморо ба Душанбе фиристоданд, кормандони мақомотҳои қудратии Тоҷикистон бо Шумо чӣ хел муносибат карданд?

- Вақте ман дар он ҷо будам, моро метарсониданд, ки дар Тоҷикистон шуморо азоб медиҳанд, аммо ба Худо қасам бо ман мисли хоҳар муносибат карданд. Ягон намуд азоб, шиканҷа ва фишори равониро нисбати ман раво надиданд. Медонед, чанд вақт чизе дурусте нахӯрда будам, ба ман қурутоб оварданд. Кулчаро баъди чандин сол хӯрдам...

-Шумо боре ҳам фикр кардед, ки ҳамаи шахсоне, ки Шуморо иҳота мекарданд, аз ҳамон гурӯҳ буданд? Мисол дугонаатон, занаки чечен, Элмун…

Модари Ҷамолбӣ, ки дар вақти суҳбат  бо мо нишаста буд, дар ҷавоби ба ин савол пешдастӣ кард:

-Ин аз куҷо медонад, ӯро фиреб карданд, аз содагӣ ва бесаводиаш истифода карданд. Ин ҳатто мактаб нахондааст, то синфи чор таҳсил карда буду халос…

Ҷамолбиву волидайнаш вақти гусел то дарвоза омаданд. Вақти хайрухуш аз Ҷамолбӣ пурсидам: 

-Ҳоло вазъи саломатиатон чӣ хел, то ҳол садои  тиру туп дар гӯшатон будагист?

-Сарам дард мекунад, баъзан он чунон дард мекунад, ки аз замин  бардошта наметавонам.

-Осуда бошед, обу ҳавои Тоҷикистон шифо мебахшад!

..Аз дар баромада ҳанӯз ҳамон ҷумла дар гӯшам садо медиҳад: «…аз содагӣ ва  бесаводиаш истифода карданд. Ин ҳатто мактаб нахондааст, то синфи чор таҳсил карду халос…».

Одили НОЗИР,

«Тоҷикистон»

Мақомоти иҷрои ҷазои Тоҷикистон Маҳмадрузӣ Искандаров, раиси Ҳизби демократро барои риоя накардани қоидаҳои маҳбас ҷазо дода ва ӯро ба адои ҳукм ба зиндони Кирпичний дар ноҳияи Ваҳдат интиқол додаанд.

Аббосидин Ҳомидов, бародарзодаи Маҳмадрузӣ Искандаров, гуфтааст, ки баъди нашри мусоҳибаи сиёсатмадори зиндонӣ бо Радиои Озодӣ, намояндагони Раёсати ислоҳии маҳбаси вазорати адлия ӯро ба зиндони “Кирпичний” интиқол додаанд.

 Дар зиндонҳои Тоҷикистон сӯҳбат  бо матбуот бе иҷозат мамнӯъ аст. Як мақоми раёсати маҳбасҳои вазорати адлия гуфтааст, ки “се рӯз аст, ки Маҳмадрузӣ Искандаров дар маҳбаси рақами 4/7 давраи карантинро пушти сар карда, бо қоидаҳои ин маҳбас шинос шуда, баъди 9 рӯз барои адои давраи ҷазо дар ҳамин маҳбас мемонад.”

Аммо ин манбаъ сабаби аслии аз Маҳбаси махсуси раёсати ислоҳии ба зиндони Кирпичний интиқол додани Маҳмадрузи Искандаровро шарҳ надодааст.  Маҳмадрузӣ Искандаров ҳафтаи гузашта дар сӯҳбат бо Радиои Озодӣ гуфта буд, ки  “иштибоҳи Ҳизби демократ дар солҳои аввали истиқлолият ин буд, ки аз паси Ҳизби наҳзати исломӣ рафтааст.”

 Вазирони адлияи кишварҳои узви Созмони Ҳамкориҳои Шанхай дар шаҳри Душанбе ҷамъ омаданд ва масоили ҳамкориҳо ва таъмини волоияти қонун дар кишварҳои узвро баррасӣ мекунанд. Дар нишасте, ки дар Китобхонаи Миллӣ баргузор гардид,  вазирони адлияи Русия, Чин, Қазоқистон, Қирғизистон, Узбекистону Тоҷикистон ва ҳамчунин намояндагони кишварҳои нозир – Афғонистон, Ҳинд ва Покистон  ширкат доранд. Вазорати корҳои хориҷии Узбекистон гуфт, ки ҳайати ин кишвар дар раъси Музаффар Икромов, вазири адлияи Узбекистон ба ҷаласаи Душанбе рафтаанд. Баррасии дурнамои ҳамкориҳо миёни вазоратҳои адлияи кишварҳои Созмони Ҳамкориҳои Шанхай ва таъмини волоияти қонун, ҳамоҳангӣ дар қонунгузориҳои кишварҳои узв аз масоили матруҳа дар нишасти Душанбе аст. Интизор меравад, ки  дар поёни нишаст, изҳороти муштарак қабул шуда ва мувофиқатномаи ҳамкорӣ миёни вазоратхонаҳои адлияи кишварҳои узв ба имзо бирасад.

Дар Шӯъбаи корҳои дохилии ноҳияи Шаҳритус гуфтаанд, ки гурӯҳе аз ҷавононро бо иттиҳоми боло кардани парчами сиёҳи монанд ба парчами гурӯҳи "Давлати исломӣ"дар муҷассамаи Исмоили Сомонӣ дар маркази ноҳия боздошт кардаанд.

Маълум нест, ки ҷавонон матои монанд ба парчами "Давлати исломӣ"-ро дар муҷассамаи асосгузори нахустин давлати Тоҷикон ҳадафмандона бардоштанд, ё танҳо "шӯхӣ"кардаанд. Аз Шӯъбаи корҳои дохилӣ  гуфтаанд, ки дар бораи теъдоди боздоштшудаҳо ва ҷузъиёти ҳодиса хабар дода наметавонад ва бояд ҳамагӣ натиҷаи пурсиш ва таҳқиқотро интизор шаванд.

Абдуалим Исмоилзода -- раиси ноҳияи Шаҳритус ҳам дар сӯҳбате гуфтааст, ки "феълан бо масъалаи ҷавонони боздоштшуда Шӯъбаи амният ва Шӯъбаи корҳои дохилии ноҳия машғул ҳастанд ва ин масъаларо ҳамаҷониба таҳқиқ доранд."Бино ба гузоришҳо, ин гурӯҳи ҷавонон аз деҳаи Ленинободи ҷамоати ба номи "Холматов"-и Шаҳритус будаанд.

Абдураҳим Урунов, раиси ин ҷамоат гуфтааст,ки  барои шарҳи ин ҳодиса ба мақомоти амниятӣ даъват шуда ва баёнот додааст. Ӯ мегӯяд, ки тафсилотро намедонад, аммо шунидааст, ки ин ҷавонон пораи матои сиёҳ бо навиштаи Аллоҳро дар муҷассамаи Исмоили Сомонӣ овезон кардаанд. "Ҳоло ҳамаи кормандони амният ва муфаттишон Ленинобод ҳастанд. Ҳамонҷо  оварда, дар деҳаи Ленинобод пурсида истодаанд. Афсару муфаттишон дар ҳамонҷо ҳастанд, барои тафтишот. Ба мо нагуфтаанд, махфӣ нигаҳ медоранд. Ман рафта баёнот навишта омадам. Ман навиштам, ки надидам, намедонам," -- гуфтааст Абдураҳим Урунов. 

Ленинобод деҳаест, ки як сокини он Ҳусейн Содиқови 30-сола моҳи июл барои ҷалби ҷавонон ба ҷангҳои Сурия, ба 18 соли зиндон маҳкум шуд.

Намояндаи Раёсати ҷавонон варзиш ва сайёҳии ноҳияи Шаҳритус боздошти ҷавононеро, ки гӯиё парчами сиёҳеро дар маркази ноҳия овехтаанд, тасдиқ кард, аммо гуфт, ки дар бораи теъдоди ҷавонони боздоштшуда ва онҳое, ки ин корро кардаанд, иттилоъ надорад ва мақомоти қудратӣ дар ин замина таҳқиқот анҷом медиҳанд. 

Ба гуфти як манбаи аз ҳукумати ноҳияи Шаҳритус, ҳафтаи гузашта ду рӯз пайиҳам афроди ношинос дар муҷассамаи Исмоили Сомонӣ, дар наздикии бинои ҳукумат ва дар маркази ноҳия, парчами сиёҳеро овехтаанд ва прокуратура ҳодисаро тафтиш мекунад. Ба қавли ин манбаъ, бори аввал саҳари 10-уми август ин парчами сиёҳро дар муҷассамаи Исмоили Сомонӣ дидаанд ва раиси маҳалла омада, онро гирифтааст. Мақомоти Тоҷикистон бо далели халалдор нашудани ҷараёни тафтишот хабарҳои марбут ба боздошти пайравони эҳтимолии гурӯҳи "Давлати Исломӣ"-ро ошкор намекунанд. Шарҳи сомона:Баъд аз дарёфти хабари мазкур мо ба ВКД ва Кумитаи амнияти миллии Тоҷикстон занг зада дар ин маврид тавзеҳ хостем. Тавре ки иттилоъ доданд, онҳо аз чунин ҳолати кор хабар надоранд ва Ҷалолиддин Садриддинов, сардори дафтари матбуотии ВКД гуфт, ки сари ин масъала дар маълумотномаи шабонарӯзии вазорат ягон қайд нест.

Вазири корҳои хориҷии Тоҷикистон дар маросими таҷлил аз солгарди Рӯзи истиқлоли Афғонистон дар Душанбе гуфт, ки "мо ҳамеша аз мавқеи кишвари дӯст ва ҳамзабони Афғонистон дар чорчӯби созмонҳои минтақаӣ ва байналмилалӣ пуштибонӣ намуда, ҷонибдори иштироки фаъолонаи Афғонистон ва узвияти комили он дар СҲШ мебошем."

Сироҷиддин Аслов таъкид кард, ки  Тоҷикистон ба унвони ҳамсояи наздик омодаи кумаку мусоидати лозим барои Афғонистон дар ин замина аст.

Зеро ба гуфтаи вазири корҳои хориҷии Тоҷикистон, “кишварҳои мо дар таъмини амният, субот ва пешрафти минтақа манфиати ҳаётӣ доранд ва ҷомеаи ҷаҳонӣ дарёфт, ки калиди аслии ҳалли мушкилот ва проблемаҳо ваҳдат ва иттиҳоди матин ва содиқона аст ва мо ҷонибдори тақвияти низоми навини сиёсӣ ва таъмини субот ва амният дар Афғонистон мебошем.”

Сироҷиддин Аслов сулҳу амният дар Афғонистонро амнияти пойдор дар минтақа ва ҷаҳон донист.

Абдулғафури Орзу, сафири Афғонистон дар Тоҷикистон аз ҳимоят ва кумаку мусоидатҳои ҷониби Тоҷикистон ба унвони як кишвари дӯсту бародар ва ҳамсоя изҳори қадрдонӣ кард ва ба густаришу тақвияти ҳар чӣ бештари ҳамкориҳо бо ин кишвари Осиёи Миёна таъкид намуд.

Имрӯз  сафари расмии президенти Тоҷикистон ба Ҷумҳурии Туркманистон шурӯъ мешавад. Ин сафар ду рӯз идома мекунад. Дар барномаи сафари президент ба Ашқобод, мулоқоти президентҳои  Тоҷикистону Туркманистон – Эмомалӣ Раҳмон ва Қурбогулӣ Бердимуҳаммадов дар назар аст. Инчунин, бар тибқи иттилои расмӣ, қарор аст, ки камаш панҷ созишномаи ҳамкорӣ миёни ин ду кишвар ба имзо расад. Қарор аст,  мулоқоту музокироти асосии раҳбарон рӯзи 20 август дар Ашқобод ҷараён гирад.

Як манбаи расмӣ гуфтааст, ки  «фардо мулоқот бо президент Қурбонгулӣ Бердимуҳаммадов дар пушти дарҳои баста ҷараён мегирад ва баъди ин, як нишасти васеи аъзои ҳукумат дар назар аст. Дар паи он Эмомалӣ Раҳмон бо ҷараёни кори сотхмони «шаҳраки Олимпӣ» дар ҳудуди пойтахти Туркманистон шинос хоҳад шуд. Соли 2017 дар Туркманистон баргузории бозиҳои Панҷуми осиёӣ дар назар аст ва ин маҷмааи варзишӣ ба ҳамин муносибат бунёд мешавад». Қарор аст дар ҷараёни сафари Раҳмон ба Ашқобод, созишномаҳои ҳамкорӣ бо Туркманистон дар соҳаи нақлиёт, энергетика, фарҳанг, маориф, бахши иҷтимоӣ ва тиҷорат низ имзо шавад.

Қурби рубли Русия ба сабаби коҳиши нархи нафт боз ҳам пойин рафтааст.

Рӯзи 19 август қурби як доллари Амрико ба 66 рубли русӣ  наздик шудааст, ки дар 6 моҳи охир пойинтарин қурб барои рубл ба шумор меравад. Иқтисоддонҳо уфти нархи нафтро як сабаби коҳиши қурби рубл медонанд. Нархи як бушка нафти хоми навъи Brent рӯзи 19 август боз 11 сенти дигар пойин рафта, 48 доллару 70 сентро ташкил дод. “Сбербанк”-и Русия ба дунбол гуфт, агар нархи як бушка нафти Brent то 45 доллар пойин равад, қурби як доллар ба 70 рубл хоҳад расид. Аксари муҳоҷирони тоҷик маоши худро дар Русия бо рубл мегиранд ва коҳиши қурби рубл боиси кам шудани ҳаҷми пулҳое, ки онҳо ба Тоҷикистон мефиристанд, мешавад. Аз аввали сол ҳаҷми пулҳои фиристодаи муҳоҷирони тоҷик 32 дарсад коҳиш ёфтааст. Соли гузашта онҳо ба Тоҷикистон 3,9 миллиард доллар пул фиристода буданд.

Суди Олии Ҷумҳурии Тоҷикистон иттилоъ медиҳад, ки Муррабии шоиста , аълочии маориф ва омузгори тарбияи ҷисмонии мактаби рақами 7-и ҷамоати деҳоти 1-уми майи ноҳияи Турсунзода, Юлдош Айматов,  барои куштори ду ҳамкораш ба мӯҳлати 30 сол аз озодӣ маҳрум шуд.

 Ёдовар мешавем, ки номбурда, санаи 29 майи соли равон Дилором Нишонова, мудири мактаби 7 ва муовини ӯ Гулнора Юлдашеваро бо зарби корд ба қатл расонид. Тибқи иттилои Вазорати корҳои дохилӣ , сабаби  ба куштор даст задани айбдоршаванда , вайрон шудани  муносибатҳои  кориаш бо роҳбарияти мактаб  будаст. Ба иттилои манбаъ,  соати 9:30 аз бозор корд харида ба мактаб равона мешавад ва дар утоқи кории директор ҷангу ҷанҷол намуда, Дилором Нишоноваро  як зарба дар қисмати гардан мезанад , ки дар натиҷа ҷабрдида дар ҷойи ҳодиса ҳалок мегардад.  Бо ин қаноат накарда дар саҳни мактаб муовини директор Гулнора Юлдашеваро дар ҳузури хонандагон корд захмӣ мекунад, ки маҷрӯҳ дар натиҷаи ҷароҳати вазнин дар беморхона ба ҳалокат мкерасад.