Имрӯз Равшан Носирӣ тоҷик аз Нидерландия, ки узви ҳайати мушовараи ҳафтаномаи «Тоҷикистон» мебошад, ба идораи рӯзнома ташриф овард.

Наздики ду соат ҳайати эҷодии ҳафтанома бо Равшан Носирӣ сӯҳбати озод доштанд. Аз ҷумла, ҳайат дар бораи зисту зиндагӣ, шароити кор, расму русуми мардуми Нидерланд ба меҳмон суол дода,  посухҳои мушахас пайдо карданд.

Тавре ки номбурда иттилоъ дод, ӯ баъди хатми мактаби миёна дар Тоҷикистон охирҳои ќарни 20 барои таҳсил ба Олмони Ғарбӣ ва баъди он ба Шоҳигарии Нидерландия рафта, ба  Донишгоҳи  Лайдени Ҳуланд дохил шуда, дар риштаи ҳукук таҳсил кардааст . Айни замон дар Вазорати  маориф, маданият ва инноватсияи Шоҳигарии Ҳуланд фаъолият дорад.

Дар мавриди шарту шароити таҳсил ва чӣ гуна роҳ ёфтани донишҷӯёни тоҷик ба донишгоҳҳои олии Ҳуланд номбурда ҷавоб дод, ки «Донишҷӯёни тоҷик ҳастанд, аммо каманд. Бештар онҳо дар риштаи ҳуқуқ ва иқтисод таҳсил мекунанд. Роҳ ёфтан ба Донишгоҳҳои Ҳуланд, аз дониш вобастагӣ дорад ,забондонӣ ҳам хеле муҳим аст. Дар тамоми донишгоҳҳои Ҳуланд, забони англисӣ забони дуввум аст. Агар забонро надонанд,  ба он ҷо роҳ намеёбанд».

Ба гуфтаи номбурда, аз ин ҷмиҳат дар Ҳуланд хондан осон ва арзон ҳам нест. Бинобар ин, ба даст овардани  дипломи Ҳуланд нисбат ба дигар давлатҳо душвортар мебошад.

Тибқи як қарори имзонамудаи Эмомалӣ Раҳмон муассисаи таълимии «Литсей -интернати муштараки тоҷикию туркии ба номи Ҳоҷи Камоли шаҳри Душанбе», «Литсей -интернати муштараки тоҷикӣ -туркии иқтисодии Душанбе», инчунин литсей -интернатҳои муштараки тоҷикию туркии шаҳрҳои Хуҷанд, Турсунзода, Кӯлоб ва ба номи Ҷалолиддин Румии шаҳри Қӯрғонтеппа бо нигоҳ доштани иншооти мавҷуда, воҳидҳои кории амалкунанда ва бо тартиби худмаблағгузорӣ мутаносибан ба Муассисаи давлатии таълимии /МДТ/«Литсей барои хонандагони болаёқат дар шаҳри Душанбе”, МДТ «Литсей барои хонандагони болаёқати равияи иқтисодӣ дар шаҳри Душанбе”, МДТ «Литсей барои хонандагони болаёқат дар шаҳри Хуҷанд”, МДТ «Литсей барои хонандагони болаёқат дар шаҳри Турсунзода”, МДТ «Литсей барои хонандагони болаёқат дар шаҳри Қӯрғонтеппа”, МДТ «Литсей барои хонандагони болаёқат дар шаҳри Кӯлоб” табдил дода мешаванд.

Раиси ҳукумати Тоҷикистон Вазорати маориф ва илмро муваззаф кардааст, ки масъалаҳои ташкилию ҳуқуқии муассисаҳои зикршударо ҳал намояд. Ҳукумати Тоҷикистон инчунин Қарори Шӯрои Вазирони Ҷумҳурии Тоҷикистон аз 19 авгутси соли 1994-ро, ки заминаи ҳуқуқии фаъолияти литсейҳои туркӣ буд, аз эътибор соқит карда, масъалаи ба Кумитаи давлатии сармоягузорӣ ва идораи амволи давлатӣ супоридани биною иншоот ва дигар амволи муассисаҳои зиркшударо ба дӯши Вазорати маориф ва илм вогузор кардааст. 

Қаблан Вазорати маориф ва илми Тоҷикистон аз поён ёфтани шартномаи фаъолияти литсейҳои туркӣ, ки таҳти пуштибонии ширкати “Шалола” дар кишвар фаъолият мекунанд хабар дод ва баъдан масъалаи тағйири номгузорияшонро ба миён гузошт. Ба иттилои ин ниҳод “Шалола” дорои 6 литсей дар Душанбе, Қӯрғонтеппа, Турсунзода, Кӯлоб ва Хуҷанд буда, инчунин литсейи байналмилалии Душанбе низ ба он тааллуқ дорад. 

6-уми августи соли ҷорӣ сафири ИМА хонум Сюзан М. Эллиотт дар якҷоягӣ бо роҳбарияти  Оҷонсии Иттиҳоди Муттаҳидаи Амрико дар Тоҷикистон оид ба рушди байналхалқӣ (ЮСАИД) ва Ассотсиатсияи миллии занони соҳибкори Тоҷикистон (АМЗСТ) ба лоиҳаи «Фаъолияти соҳибкории занон-воситаи васеъ намудани имкониятҳо  ва ҳуқуқҳои онҳо» дар Қурғонтеппа ҳусни оғоз бахшиданд.

Дар маросими мазкур  муовини раиси вилояти Хатлон Абдуҷаббор Баҳодуров ҳозиринро бо суханони ифтитоҳи пазироӣ намуд. Лоиҳаи сесола ба самти коҳиш додани  сатҳи камбизоатӣ тавассути густариш додани иқтидори занон ҷиҳати ташкили фаъолияти бомуваффақияти соҳибкорӣ дар соҳаи хоҷагии қишлоқ равона карда шудааст. Лоиҳаи номбурда ба баробарии гендерӣ ва васеъ гардонидани ҳуқуқу имкониятҳои занон мусоидат намуда, занонеро, ки хоҳиши шурўи фаъолияти соҳибкории хурд доранд, рўҳбаланд сохта, дастгирӣ менамояд. Ин барнома инчунин аз афзалиятҳои ташаббуси президент Обама «Озукаворӣ ба хотири оянда» оид ба бехатарии озуқаворӣ, ки аз ҷониби ЮСАИД дар вилояти Хатлон татбиқ мегардад, ҷонибдорӣ менамояд. Ташаббуси «Озукаворӣ ба хотири  оянда» ба афзоиши истеҳсолоти маҳсулоти кишоварзӣ ва зиёд намудани даромади занону мардон дар манотиқи деҳот, ки барои онҳо соҳаи кишоварзӣ манбаи даромад ба ҳисоб меравад,  мусоидат мекунад. Он, инчунин, ба беҳтар намудани сифати озуқаворӣ дар Тоҷикистон, ба хусус, барои занону кўдакон равона карда шудааст. 

Сафир Эллиотт нақши муҳими занонро дар ҷараёни рушд, моҳияти дастрасии занро ба захираҳои иҷтимоӣ, молӣ ва сиёсӣ таъкид намуд.  «Таъсироти мусбати лоиҳаҳо, ки  ба занон барои беҳдошти вазъи саломатӣ, баланд бардоштани сатҳи маърифатнокӣ ва беҳтар кардани шароити хуби зиндагӣ имкониятҳоро фароҳам меоваранд, берун аз  доираи як  фард аст. Маблағгузорӣ ба ояндаи зан ба беҳтар намудани сатҳи зиндагии  хонаводаи ӯ, ки он метавонад дар сохтани ҷомеаҳои  усувор кӯмак расонад, мусоидат мекунад.  

Директори генералии АМЗСТ Гулбаҳор Маҳкамова зикр намуд,"барнома бо хоҷагиҳои фермерӣ ва корхонаҳои хурд ҳамкорӣ намуда, ба хоҷагиҳои аз тарафи занон роҳбарикунанда, ки машғули сабзавоткорӣ ва мевапарварӣ мебошанд, таваҷҷўҳи хоса зоҳир менамояд. Барномаи мазкур аз сабаби моҳияти ин манотиқ дар таъмини бехатарии озуқаворӣ барои хонаводаҳо дар доираи ин мавзеҳо равона шудааст.  

Ҳукумати Иёлоти Муттаҳида тасмим гирифтааст, ки кўмак ва дастгирии хешро ба халқи Тоҷикистон идома дода, минбаъд аз нақши фаъоли занон дар рушди иқтисодии Тоҷикистон ҷонибдорӣ хоҳад кард. Аз соли 1992 то ин ҷониб халқи Амрико зиёда аз 1 миллиард доллари амирикоиро ба  барномаҳо ва ёрии башардўстона, ки барои дастгирии ниҳодҳои демократӣ, соҳаҳои тандурустӣ, маориф ва рушди иқтисод дар Тоҷикистон равона шудаанд, сарф намудаанд.

Вазорати тандурустӣ ва ҳифзи иҷтимоии аҳолии Тоҷикистон бинобар идома ёфтани гармои шадид дар кишвар дар марказҳои саломатӣ нуқтаҳои таъмини доруи “Регидрон”-ро ба роҳ мондааст.

Наврӯз Ҷаъфаров, муовини вазири тандурустӣ, гуфтааст, ки тобистони имсола гармтар омад ва ба хотири ҷилавгирӣ аз бемории кӯдакони то 7-сола, ки ба қавли ӯ қишри осебпазир ба шумор мераванд, чораҳои иловагӣ андешида шудааст. Ҷаъфаров афзуд, “барои эҳтиёт аз гармо варақаҳои иловагӣ низ нашр карда, миёни мардум тақсим намудем”.Аммо маълум нест,ки дору ройгон аст  ё пулаки

Эмомалӣ Раҳмон, Президенти Тоҷикистон барои анҷоми як сафари расмӣ ба Ҷумҳурии Туркманистон меравад.

Тавре ки дар ин бора  аз Вазорати корҳои хориҷии кишвар  хабар додаанд, ин боздиди Эмомалӣ Раҳмон рӯзи 19 августи соли равон дар назар дошта шуда, 20 август дубора ба Душанбе бармегардад.

Манбаъ мегӯяд, Эмомалӣ Раҳмон дар ҷараёни ин сафар бо ҳамтои туркмани худ - Қурбонгулӣ Бердимуҳаммадов дидор ва гуфтугӯ хоҳад кард: Роҳбарони Тоҷикистону Туркманистон робитаҳои дуҷониба ва масоили мубрами минтақавиро баррасӣ мекунанд.

Вазорати фарҳанги Тоҷикистон иттилоъ медиҳад, ки ғолиби имсолаи Фестивал-озмуни ҷумҳуриявии “Оши палав”-ро “Кафгири тиллоӣ” интизор аст. 

Бино ба иттилои дафтари матбуоти ин ниҳод, Фестивал-озмуни “Оши палов” алакай дар даҳаи аввали моҳи август дар миқёси ҷумҳурӣ оғоз шуда, дар ду давр -- ноҳиявӣ ва ҷумҳуриявӣ баргузор мешавад: “Мақсад аз баргузории Фестивал-озмун тарғиб ва оммавигардонии суннатҳои беҳтарини миллӣ буда, воситаи хубе барои ваҳдати миллӣ, таҳкими ҳувияти миллӣ, тарбияти фарҳанги ошпазӣ ва такмили маҳорати касбии ошпазҳо ба шумор меравад”. 

Манбаъ меафзояд, даври ҷамъбастии Фестивал-озмун 22 август чун ҳамасола дар Дар душанбе баргузор шуда, “дар он беҳтарин ошпазҳо, ғолибони даври ноҳиявӣ ҷамъ омада, бо тамоми нозукиҳо ва ҳунарнамоиҳо оши палав пухта, дастархони намоишӣ меороянд. Тибқи нишондоди Кумитаи тадорукоти Фестивал-озмун ҳар ошпаз ҳамон палави хоси ноҳияи худро пухта, ба ҳар ноҳия гузоштани то 3 деги ғунҷоишаш тақрибан 20 кг тавсия дода мешавад”. 

Дафтари матбуоти Вазорати фарҳанг мегӯяд, ки дастранҷи ошпазҳо аз рӯи шартҳои баҳогузорӣ шуда, ғолиби асосӣ бо “Кафгири тиллоӣ” ва ғолибони ҷойҳои дигар бо туҳфаву диплому ифтихорномаҳо қадрдонӣ хоҳанд шуд.

Раёсати корҳои дохилии вилояти Суғд аз боздошти афроди гумонбар дар қатли пурсарусадои соҳибкор Аҳмадхӯҷа Бобоев, ҳамсараш - Ҳаётхон Бобоева ва фарзандонашон -Рухшона, Сӯҳроб ва Санҷарбек дар ноҳияи Бобоҷон Ғафуров хабар дод.

Генерал Шариф Назарзода -- сардори Раёсати корҳои дохилии Суғд рӯзи 9 август дар сӯҳбат бо Радиои Озодӣ гуфт, ки то замони анҷоми тафтиш аз гумонбарон ном нахоҳанд бурд, вале ҳамзамон афзуд, "ҳоло таҳқиқот ҷараён дорад ва боздоштшудаҳо алакай нишондод доданд."Назарзода гуфт, тафсилоти боздошти гумонбарони қатли оилаи Бобоевҳо, ки баъди бештар аз ду соли ҳодиса сурат гирифтааст, рӯзҳои наздик расман эълон мекунанд.

Дар ҳамин ҳол, манобеи мо дар ноҳияи Бобоҷон Ғафурови вилояти Суғд мегӯянд, ки маъмурони пулис рӯзи 8 август гумонбарон дар қатли оилаи Бобоевҳоро ба хонаи онҳо бурдаанд. Манзили Бобоевҳо аз замони ҳодисаи кушторашон қуфл буд. Ба қавли манбаъ, гӯиё боздоштшудаҳо сокинони шаҳри Хуҷанд ва падару писар будаанд. Иттилое, ки ҳоло мақомот на тасдиқ мекунанд, на радд.

Рӯзи 2 июни соли 2013 афроди ношиноси мусаллаҳ аз болои девор ба хонаи Аҳмадхӯҷа Бобоев, воқеъ дар канори шаҳраки Бобоҷон Ғафуров, ки ҳамроҳи ҳамсараш ба фурӯши ҷавоҳирот машғул буд, ворид шуда, бо истифода аз "Калашников"ӯву ҳамсар ва фарзандонашро ба қатл расонданд.

Вазорати корҳои дохилии Тоҷикистон баъд аз як рӯзи ин ҳодиса бо нашри иттилоияи расмӣ гуфт, "...шахсони номаълум бо яроқи оташфишон мусаллаҳ гашта, бо мақсади роҳзанӣ ба хонаи истиқоматии шаҳрванд Бобоев Аҳмадхӯҷа Норхӯҷаевич (1973), соҳибкор, ворид шуда, ӯ ва ҳамсараш Бобоева Ҳаётхон Шукуровна, (1974), фарзандони ноболиғаш Бобоева Рухшона Аҳмадхӯҷаевна (1997), хонандаи синфи 9-уми гимназияи №1, Бобоев Сӯҳробҷон Аҳмадхӯҷаевич (1998), хонандаи синфи 8-уми гимназияи №1-ро бо истифода аз яроқи оташфишони тамғаи АКМ-5,45-мм ба қатл мерасонанд. Баъдан фарзанди дигараш Бобоев Санҷарбек Аҳмадхӯҷаевич (2007)-ро ба ҳаммомхонаи ҳавлии истиқоматиаш маҳкам намуда, дари сандуқи оҳанини дар хонаи истиқоматӣ ҷойгиршударо мешикананд ва тахминан ба маблағи 30 000 доллар ҷавоҳироти тилоиро тасарруф мекунанд."

Ба қавли мақомот, қотилони хонаводаи Бобоевҳо бо ҳадафи рӯпӯш кардани корашон хонаро оташ мезананд, ки баъдан Санҷарбек заҳролуд шуда, дар ҳаммомхона ба ҳалокат расидааст. Додситонии вилояти Суғд дар робита ба ин қазия парвандаи ҷиноӣ боз карда, як гурӯҳи махсуси тафтишоти фаврӣ машғули таҳқиқи ҳодиса буданд. 

Мақомоти интизомӣ эълон карданд, барои касоне, ки қотилонро ошкор мекунанд, ва ё барои кушодани ин ҷиноят мусоидат менамоянд, 30 000 доллар мукофот хоҳанд дод. Президенти кишвар низ охири моҳи июни 2013 ҳангоми мулоқоташ бо раҳбарон ва фаъолони вилояти Суғд дар Хуҷанд аз мақомоти ҳифзи ҳуқуқ хоста буд, тамоми нерӯву имконоти худро ба кор баранд ва қотилони оилаи Бобоевҳоро ошкор ва дастгир кунанд.

Сафорати Тоҷикистон дар Русия аз ҳодисаи суиқасд ба ҷони олими ҷавони соҳаи дин Хайриддини Абдуллоҳ (Достаков), ки шоми 7 августи соли равон дар наздикии метрои "Рязанский проспект"-и шаҳри Маскав ба вуқӯъ пайвастааст,  изҳори нигаронӣ мекунад.

Дар паёме аз тарафи намояндаи расмии ин сафорат Муҳаммади Эгамзод,  гуфта мешавад, ки масъулони сафорат рӯзи 8 август чанд бор дар Бемористони ба номи Склифосовский буданд ва бо духтури навбатдор Андрей Пивен сӯҳбат доштанд.

Вазъи Хайриддин, ки шахсони номаълум ӯро чанд корд задаанд, то ҳол вазнин арзёбӣ мешавад. Аммо, шоми 8 август, ҳангоми суҳбати телефонӣ духтури навбатдор ба ҷаноби Эгамзод гуфтааст, "Хайриддин ба худ омадааст, ки ин як шӯълаи умед барои шифо ёфтанаш аст."

Масъулони Сафорат, инчунин, бо мақомоти пулиси Маскав мулоқот дошта ва аз ҷузъиёти ин қазия пурсидаанд. Маълум шудааст, ба номбурда дар наздикии метрои "Рязанский проспект"-и пойтахти Русия, ки манзили зисташ дар он ҷо будааст, чанд нафари ношинос дарафтода ва бо чанд зарбаи корд ӯро аз по афтондаанд. Барои пажӯҳиши ин воқеа парвандаи ҷиноӣ боз шудааст ва тафтишот идома дорад.

Муҳаммади Эгамзод менависад, ки Хайриддини Абдуллоҳ, ё Мулло Хайриддинро ба хубӣ мешиносад. "Нафари аз дониши хуби исломӣ ва фарҳангиву ахлоқӣ бархӯрдор аст. Нафарест, ки солҳо боз дар миёни ҷавонону наврасон дар мавриди исломи анъанавӣ, ахлоқи ҳамида ва фарҳанги таҳаммулпарварӣ сӯҳбатҳо мекунад ва ҳамеша алайҳи равияву гурӯҳҳои ифротиву радикалӣ, ки Исломро бадном мекунанд, садо баланд менамояд. Ӯ муаллифи мақолаву андарзҳои саршори ҳикмати диниву ахлоқист, ки барои муҳоҷирони мусулмонтабор дар нашрияҳои мухталиф дар Русия, аз ҷумла дар "Тоҷикони Россия"ва шабакаҳои иҷтимоӣ мунтазам чоп мешуданд."

Сафорати Точикистон дар Русия аз мақомоти пулиси Маскав тақозо намудааст, ки ҳарчи зудтар таҳқиқоти ин қазияро ба анҷом бирасонад, гунаҳкорони ин суиқасдро дастгир ва муҷозот намояд.

Сарраёсати нерӯҳои марзбонии Кумитаи давлатии амнияти миллии Тоҷикистон мегӯяд, ки дар он сӯи Дарвоз нооромиҳо вуҷуд дорад, аммо манотиқи марзии кишвар ором аст. 

​ Муҳаммадҷон Улуғхоҷаев, сухангӯи Сарраёсати нерӯҳои марзбонӣ дар сӯҳбат ба Радиои Озодӣ гуфт, "дар манотиқи марзии ноҳияи Дарвоз сарҳадбонони тоҷик ба назорати сарҳад идома медиҳанд. То кунун ҳеч нишонае, ки аз тарафи Афғонистон таҳдид сурат гирифта бошад, ба мушоҳида нарасидааст."Аз чанд рӯз ба ин тараф дар вулусволии Кӯфоби Дарвози Бадахшони Афғонистон, ҳаммарз бо Дарвози Тоҷикистон, миёни нерӯҳои афғон ва Толибон даргирӣ идома дорад. Мақомоти амниятӣ дар вилояти Бадахшони Афғонистон мегӯянд, ки дар вулусволии Кӯфоби Дарвоз чаҳор фармондеҳи Толибон кушта шудаанд.

Дар пайи садамае дар шоҳроҳи Душанбе - Кӯлоб - Дарвоз нӯҳ нафар ба дарёи Панҷ ғарқ шуда, ҷон бохтаанд.

Вазорати корҳои дохилии Тоҷикистон мегӯяд, ки ин ҳодиса шаби 7 августи соли ҷорӣ рух додааст. Ба иттилои манбаъ, "ронандаи автомашинаи тамғаи “Опел-Астра”, Ҷумъаев Мамадамонулло (1981), сокини деҳаи Ширги ноҳияи Дарвоз, ҳангоми ҳаракат дар километри 319-уми шоҳроҳи “Душанбе-Кӯлоб-Дарвоз” аз ӯҳдаи идораи воситаи нақлиёт набаромада, ба тарафи рости роҳ аз баландии 12 метр ба дарёи Панҷ чаппа шудааст. Дар натиҷа худи ронанда ва мусофиронаш: Воҳидова Оиниссо (1984), Ҷумъаева Ҳабиба (1976), Сурхова Раҳима (1982) - сокинони шаҳри Душанбе, Шокирова Садбарг (1978), сокини ноҳияи Шаҳринав, Мансури Адабҷон (2011), Наргисаи Умар (2012), Фотимаи Диловар (2014) ва Умедаи Диловар (2009) дар дарё ғарқ шудаанд

Суди  ноҳияи Синои шаҳри Душанбе бо дархости Прокурори генералии Тоҷикистон ба баррасии парвандаи се масъули дигари ширкати "Ҳафт бурҷ"оғоз кардааст.

Аммо масъулони дафтари матбуоти суди ноҳияи Сино рӯзи гуфтаанд, ки Саъдуллоев С.Х., Саидов Р.К. ва Хушмаҳмадов Ш.М. аз Тоҷикистон фирор карда, аз иштирок дар мурофиаи судӣ сарпечӣ намудаанд.

Ба иттилои манбаъ, ин афрод ҳоло ё дар Туркия ва ё дар Иморати Муттаҳидаи Араб ба сар мебаранд."Тибқи парванда онҳо 125 ҳазору 602 доллару 5 сенти ширкатро аз худ намудаанд," -- афзуд манбаъ.

Тавре аз суди  ноҳияи Сино ба мо гуфтанд, парвандаи се масъули дигари "Ҳафт бурҷ"дар аввали моҳи июли соли ҷорӣ дар пайи шикояти муштариёни ин ширкат аз сӯи Додситонии кулли Тоҷикистон ба онҳо ирсол шудааст. 

Қабл аз ин, дар моҳи октябри соли гузашта додгоҳи Синои пойтахт ду намояндаи ширкати "Ҳафт бурҷ" Олим Маъруфов ва Ориф Расуловро дар қаллобӣ муҷрим шинохта, 8,5-солӣ аз озодӣ маҳрум кард. Маблағи умумии зиёни расида ба муштариёни ширкати "Ҳафт бурҷ"баробари 618 000 доллар гуфта мешавад. Аммо Олим Маъруфов, яке аз масъулони ин ширкат, ки равонаи зиндон шудааст, ҳангоми баррасии парвандааш дар толори додгоҳ, гуфта буд, ки "агар гунаҳкор мебудам, аз Дубай намеомадам. Танҳо мехостем, бо маблағи ҷамъшуда дар ширкат маҳсулот харида, онро фурӯшем, то ба худ ва муштариён манфиат орем. Аз ин бештар нияте надоштем. Вале вақте фаъолияти ширкатро боздоштанд, дигар натавонистем кори ширкатро пеш бурда, фоидаи пули муштариёнро бидиҳем."

Маъруфову Расулов аз суди ноҳияи Синои пойтахт хоста буданд, ки барои баргардондани маблағи мардум ба онҳо иҷозат дода шавад, то ба ҷазираҳои “Сейшел” раванд ва баъдан барои фурӯши колои худ ба Ҷумҳурии Чех ва Ветнам сафар кунанд. 

Прокуратураи генералии Тоҷикистон дар қароре аз 18 июли соли 2013 фаъолияти ширкати “Ҳафт бурҷ”-ро манъ кард ва ҳисобҳои онро баст. Он замон дар номае дар бораи сабаби баста шудани ин ширкат, ба хатари пирамидаи молӣ будани он ва эҳтимоли зиёни молӣ дидани шаҳрвандон, ишора карда буд. «7 бурҷ» бо ширкати “Sanfond Financial Inc”, ки дар ҷазираҳои Сейшел сабти ном шудааст, шартнома дорад ва мувофиқи меъёрҳои “Гурӯҳи татбиқи чораҳои молиявӣ оид ба шустани пул”, ҷазираҳои Сейшел ба феҳристи оффшорҳо шомил мешавад.

Фаъолияти ширкат ба тариқи тиҷорати шабакавӣ ба роҳ монда шуда, шаҳрвандон баъди ба имзо расондани шартнома ва пардохти маблағҳое дар ҳаҷми 130, 260, 500, 2000 ё 9000 доллар вориди ширкат мешуданд. Онҳо шаҳрвандони дигарро низ ба ин ширкат ҷалб мекарданд ва аз маблағи воридшуда даромади муайяне ба даст меоранд. Ҳоло муштариёни ҷабрдидаи ин ширкат мегӯянд, ки аз ҳабс кардани масъулонаш ба онҳо фоидае намерасад ва онҳо аз мақомот талаб доранд, ба ҷои ин зиёни молии онҳо ҷуброн шавад.

Ҳамроҳхон Зарифӣ, собиқ вазири корҳои хориҷии Тоҷикистон сафири фавқулода ва мухтори кишвар дар Ҷопон таъин шудааст.

Ӯ дар ин мақом Ғуломҷон Бобозодаро иваз кард.  Дар ин бора фармони Президенти Тоҷикистон 10 августи соли ҷорӣ нашр шуд. Инчунин, Файзулло Холбобоев сафири нави Тоҷикистон дар Украина таъин гардидааст.

То ин вақт Шӯҳрат Султонов Тоҷикистонро дар Украина намояндагӣ мекард ва Файзулло Холбобоев намояндаи комилҳуқуқи Тоҷикистон дар Комиссия оид ба масъалаҳои иқтисодии назди Шӯрои иқтисодии ИДМ, Намояндаии доимии Тоҷикистон дар назди Иттиҳоди иқтисодии Евразия буд.

Ҳ. Зарифӣ моҳи ноябри соли 2013, баъд аз интихоботи президентӣ, дар пайи ба истеъфо рафтани ҳукумати Тоҷикистон курсии худро дар ихтиёри Сироҷиддин Аслов гузошт ва баъд аз он мақоми давлатӣ нагирифта буд. Ҳамроҳхон Зарифӣ аз соли 2006 то 2013 вазири корҳои хориҷии Тоҷикистон буд.

Имрӯз дар Донишкадаи тарбияи ҷисмонии Тоҷикистон ба номи Саидмуъмин Раҳимов бахшида ба Рӯзи варзишгарон чорабинии идона доир гардид.

Тавре ки Наврӯз Қурбонов,Мутахассиси пешбари Бахши таҳлил ва иттилооти Кумитаи ҷавонон, варзиш ва сайёҳӣ хабар дод, дар чорабинӣ муовини якуми Раиси Кумитаи ҷавонон, варзиш ва сайёҳӣ Мавсума Муинӣ, мутахассисону собиқадорони соҳаи варзиш, ҷоизадорону ғолибони мусобиқаҳои варзишӣ ва дӯстдорони тарзи ҳаёти солим ширкат варзиданд. Мавсума Муинӣ нахуст ҳамаи иштирокчиёнро бахшида ба Рӯзи варзишгарон табрик намуда, ба онҳо муваффақиятҳо таманно намуд.

Сипас, собиқадорони соҳа оид ба дастоварду пешравиҳои дар соҳаи варзиш суханронӣ намуданд.

Дар чорабинӣ аз ҷониби Кумитаи ҷавонон, варзиш ва сайёҳӣ ба як қатор варзишгарон унвонҳои варзишӣ, ба собиқадорон кӯмакпулӣ ва туҳфаҳои хотиравӣ ва ба кормандони соҳа, ки дар татбиқи сиёсати давлатии варзиш саҳми арзанда гузоштаанд, Сипосномаи Раиси Кумитаи ҷавонон, варзиш ва сайёҳӣ супорида шуд.

Ҳамин тавр, варзишгарон Вайсиддин Ибодов, Бахтиёр Гулов, Равзатуллоҳ Исоев, Мавлоншо Акобиров ва Меҳрубон Сангинов соҳиби унвонҳои устоди варзиш гардида, Дилором Каримова муовини якуми ректори Донишкадаи тарбияи ҷисмонӣ, Қосим Қурбонов директори Коллеҷи тарбияи ҷисмонӣ, Рустам Давлатов директори мактаби гӯштин, Эркин Латипов, Элмурод Тағоев, Маҳмадшариф Сулаймонов мураббии гуштини самбо, Дилшод Абдураҳимов, Баҳром Ишратов, Ҷамшед Ҳамроев, Зайдулло Имомалиев кормандони дастгоҳи марказии Кумита бо Сипосномаи Раиси Кумитаи ҷавонон, варзиш ва сайёҳӣ қадрдонӣ шуданд. 

Баъди ду метр дарунтар гирифтани девори хонаи Фахриддин Шарофов, сокини дехаи Сомониёни Исфара, ҷониби Қирғизистон маҷрои об ба ҷамоати Чоркӯҳро боз кардааст.

Неъматбой Олимов -- раиси хоҷагии Чоркӯҳ гуфтааст, ки ифтитоҳи роҳ ба сӯи қабристони қирғизҳо ва кушода шудани роҳи оби сокинони Исфара рӯзи якшанбе дар маросими ботантана сурат гирифтааст.

“Сокинони ду тарафи марз дар деҳаҳои Сомониёни Тоҷикистон ва Куктоши Қирғизисон аз ин иқдом изҳори хушӣ карда, дасти ҳамсоядориро ба якдигар дароз карданд,” -- афзуд ӯ. Даҳҳо тан аз маъмурони пулис, ки ба маҳалли муноқиша оварда шуда буданд, ба ҷойи кори пешинаи худ баргаштаанд. Неъматбой Олимов мегӯяд, ки ҳоло фақат барои назорати вазъ панҷ маъмури пулиси ШКД-2-и ҷамоати Чоркӯҳ боқӣ монданду бас. Задухӯрд миёни сокинони рустоҳои Сомониён ва Куктош

рӯзҳои 3 ва 4 августи соли ҷорӣ дар қитъаи марзии байни рустоҳои Сомониён (Тоҷикистон) ва Кӯктош (Қирғизистон) сар зад. Муовини сарвазири Қирғизистон ваъда дод, ки ҳама иғвогарони моҷарои охир дар марзи Тоҷикистону Қирғизистон ба ҷавобгарӣ кашида мешаванд.

Директори  генералии рӯзномаи “ИмрӯзNtws”, Муним Оламов дар рафти иҷлосияи интихоботӣ –ҳисоботӣ дар таърихи 6-уми август,  дар шаҳри Душанбе, котиби генералии навбатӣ  (котиби генералии ҳафтум) асотсиятсияи мустақили журналистии “Медиа Алянси Тоҷикистон”  (МАТ) интихоб гардид. Ба ҷонибдории ӯ аксарияти аъзоёни ҳузурдоштаи ташкилот раъйи худро доданд, як нафар аз овоздиҳӣ худдорӣ намуд. Дар иҷлосия ҳамчунин ҳайъати нави Шӯрои назоратии алянс (Садорат) интихоб гашт, ки ба он Зинатуллоҳ Исмоилов, директори ТВ-и мустақили “СМТ”,- рӯзноманигорон Муҳаё Нозимова,  Бахтиёр Мусоев (муҳаррири АИ “Авесто”) шомил шуданд. Роҳбари Шӯро Муҳаё Нозимова интихоб гашт. Хуршед Ниёзов (сармуҳаррири ҳафтаномаи “Фараж”), Дилшод Абдумаҷидов (“Фараж”) ва Зафар Абдуллоев аъзоёни комиссияи ревизионӣ таъин гаштанд.

Муним Оламов баъд аз интихоб гаштан ба вазифаи котиби генералиӣ изҳор кард: “Ман аз ҳамкасбонам миннатдорам ки  ба ман  боварӣ карданд, ки гуруҳи ВАО-ро ки ба Медиа Алянс вориданд намояндагӣ кунам ва дар нақша дорам ки дар давраи нав саъйу кӯшиши худро барои уствории Алянс, барои боло бурдани муассирии ва устувории ВАО-е ки ба ҳайъати он шомил аст  устувор намоям ва дар маҷмӯъ ба баланд бардоштани сатҳи кабӣ ва мустақиляити ВАО-и мустақил мусоидат намоям”.

Муним Оламов айни замон директори генералии ҶДММ “ИмрӯзNews” аст, ки аввалин рӯзномаи мустақилро дар кишвар нашр мекунад.  Ӯ соли 1971 дар деҳаи Шипади ноҳияи Рӯшони ВМКБ таваллуд шудааст. Соли 2001 Донишгоҳи  муштараки славнияии Русияву Тоҷикистонро (факултаи Молия ва қарз) хатм кардааст. Аз соли 1993 то соли 2003 ҳамчун менеҷер  дар сохторҳои гуногуни тиҷоратии кишвар фаъолият  бурдааст.  

Аз моҳи январи соли 2004 то моҳи июли соли 2011 вазифаи  PR-директорро дар ширкати “Ориёно –медиа ” ба уҳда дошт. Баъд аз ин  роҳбари сохтори тиҷоратии рӯномаи ИмрӯзNews” таъин гашт, аз 25-уми  декабри соли 2012 то имрӯз директори генералии ҳамин рӯзнома мебошад.

Медия Алянси Тоҷикистон севумин асотсиатсияи ба қайдгирифтаи журналистӣ дар кишвар аст (айни ҳолдар Тоҷикистон панҷ асотсиатсия  ва иттиҳодияҳои журналистӣ фаъоланд).

Ин ташкилот 31-уми июли соли 2005 таъсис ёфта, соли равон 10-сола шуд. Айни замон Алянс 12  ВАО ва сохториҳои медиавиро муттаҳид мекунад, дар маҷмӯъ ба ҳайъати он 26 нафар шомиланд.

Ба Алянс  ТВ «Симои мустақили Тоҷикистон» (Душанбе), ТВ ва радиои «Регар» (Турсунзода), ТРК «Ватан» (Душанбе, Қӯрғон-теппа, Хоруғ), АИ «Авеста.Tj», газета «Вечёрка» (сайт vecherka.tj), «Фараж» (faraj.tj), «Самак», «Ману ту», «Варзиш-Спорт» (sports.tj), ҶК «Куҳи нор», ҶК«Даст ба даст» (dastbadast.tj), сайт TajikMama.tj ва ғайраҳо шомиланд.

Суди  Олии кишвар 11 август Зайд Саидовро бо назардошти 26 соли ҳукми қаблӣ дар маҷмуъ ба 29 соли маҳбас бо мусодираи молу мулк маҳкум кард.

Тавре хабарнигори «Тоҷикистон» иттилоъ дод, дар баробари маҳрумият аз озодӣ суд қарор кард,ки  Зайд Саидов 34 миллион сомонӣ зарари расондаро ҷуброн кунад.

Қаблан айбдоркунандаи давлатӣ дар доираи парвандаҳои нав барои Зайд Саидов, соҳибкори маҳкумшуда ба болои 26 соли маҳбас аз Суди Олӣ боз 25 соли дигар, 34 миллион сомонӣ ҷуброни зарари расонда ва мусодираи молу мулкро талаб карда буд.

Исҳоқ Табаров, вакили дифои Зайд Саидов қаблан ба  мо иброз дошта буд,ки айбдоркунанда аз парванда бо даъвои шаҳрванди Ветнамӣ дар мавриди “Тоҷикатлас” даст кашида, инчунин дар мавриди иттиҳоми пулшӯӣ низ хост, парванда аз қисми 4-и моддаи 262 ба сабуктар- қисми 2 бандубаст карда шавад.

Ӯ афзуд, ки дар робита ба гуноҳҳо зимни бунёди “Душанбе плаза” айбдоркунандаи давлатӣ аз суд дар маҷмуъ барои Зайд Саидов 25 соли  маҳбас, 34 миллион сомонӣ ҷуброни зарар ва мусодираи амволи барӯйхатгирифташударо талаб кард. Ба амволи ба рӯйхатгирифташуда аз ҷумла мошинҳои фарзандони Зайд Саидов дохил мебошанд.

Ӯ таъкид намуд, ки дар маҷмуъ бо роҳи қисман зам кардани ҷазо ба ҳукми қаблӣ прокуратура барои Зайд Саидов 30 соли маҳбас талаб кард. Зайд Саидов қаблан ба 26 соли зиндон маҳкум шуда буд.

Ширкати “Барқи Тоҷик” иттилоъ додааст, ки як қисми з кормандонашро аз кор ҷавоб хоҳад дод. 

Нозирҷон Ёдгорӣ, сухангӯи “Барқи тоҷик” сабаби ин тасмимро “баланд бардоштани вазъи молиявӣ ва ба як ширкати мувофиқ ба меъёрҳои байналмилалӣ табдил додани ширкат” арзёбӣ кард. Ӯ гуфт, ихтисори кормандон дар заминаи таҷдиди сохтори ширкати “Барқи тоҷик” ва аз сӯи комиссияи вижа сурат мегирад: “Кормандоне ихтисор мешаванд, ки аз рӯи ихтисос фаъолият надоранд”. 

Ба қавли Ёдгорӣ, созмонҳои молии кӯмакрасон, аз ҷумла Бонки осиёии рушд ба Ҳукумати Тоҷикистон пешниҳод карда буданд, дар сохтори ширкати “Барқи тоҷик” ислоҳот ворид кунад: “Ин пешниҳод ҳанӯз соли 2010 сурат гирифта буд. Ҳамин тавр, таҷдиди сохтори ширкати “Барқи тоҷик” моҳи майи соли 2012 шурӯъ шуда, бо қарори Ҳукумати Тоҷикистон Шӯрои нозирони “Барқи тоҷик” бо роҳбарии сарвазир таъсис ёфт”. 

Сухангӯи “Барқи тоҷик” меафзояд, тибқи нақша таҷдиди ширкат бояд то соли 2018 амалӣ гардад. 
 

Муҳиддин Кабирӣ, раиси Ҳизби наҳзати исломии Тоҷикистон ба Шӯрои сиёсии ин ҳизб гуфтааст, ки барои баргузории анҷумани навбатӣ, ки яке аз мавзуъҳои меҳварӣ дар он интихоби роҳбари нави ҲНИТ аст, омодагӣ бинанд.

Тибқи иттилои торнамои расмии ҲНИТ, ин масъала дар ҷараёни сафари ҳайати Шӯрои сиёсии ин ҳизб ба шаҳри Истанбули Туркия, ки бо дархости Муҳиддин Кабирӣ сурат гирифт, дар миён гузошта шудааст

Манбаъ мегӯяд, ки Кабирӣ аз Шӯрои сиёсии ҲНИТ хостааст, аз ҳоло омодагӣ ба анҷумани навбатии ин ҳизбро шуруъ карда, “машваратҳо ва иртибот миёни роҳбарият ва масьулин дар бораи ислоҳот идома дода шавад”. 

Ба гузориши торнамои расмии ҲНИТ, ҳайате аз Шӯрои сиёсии ин ҳизб бо дархости Муҳиддин Кабирӣ барои баррасии масоили муҳим, аз аз ҷумла, омодагӣ ба анҷумани навбатӣ, сиёсатҳои мақомоти давлатӣ нисбат ба ҳизб ва роҳҳои пешгирӣ аз фишору маҳдудиятҳо, инчунин, ислоҳоти эҳтимолии кадрӣ ва сохторӣ озими Истанбул шудаанд”.

Дар ҷаласаи Муҳиддин Кабирӣ бо ҳайати Шӯрои сиёсии ҲНИТ дар Истанбул сиёсати сабру таҳаммул ва натоиҷи он баҳс шуда, таъкид гардидааст, “бисёриҳо зиёдшавии фишору маздудиятҳо болои ҳизбро натиҷаи сиёсатҳои сабру таҳаммули ҳизб медонанд, вале маҳз ҳамин сиёсатҳо боиси пешгирӣ аз фитна ва дасисаҳо буд, ки баъзеҳо тарроҳӣ мекарданд. Агар ҷое ин сиёсатҳо ба зарари ҳизб анҷом шуда бошад ҳам, дар умум ба нафъи кишвар ва миллат анҷом шудааст”.

Дар асоси  натиҷаҳои назарсанҷии ахири Левада-Центр, яке аз созмонҳои бузурги назарсанҷии Русия, ҳамагӣ 7 дарсади аҳолии ин кишвар Тоҷикистонро кишвари ба Русия дӯсту муттаҳиди наздик шумурдаанд.

Ба бовари як фоизи пурсидашудаҳо, Тоҷикистон аз ҷумлаи кишварҳои "душман"-и Русия мебошад.

Левада-Центр мегӯяд,ки  ин пурсишро рӯзҳои 17-20 июли соли равон дар 46 вилояти Русия анҷом дода, назари 1600 нафарро гирифтааст. Бар асоси натиҷаҳои ин пурсиш, дар посух ба ин дархост, ки 5 кишвари аз ҳама дӯсту муттаҳиди наздики Русияро ном баред, 55 дарсад Беларусро кишвари аз ҳама дӯст барои Русия хондаанд. 43 дарсад Чин ва 41 дарсад Қазоқистонро ном бурдаанд. Аз паси онҳо  онҳо Ҳинду Арманистон – бо 18-дарсадӣ, Куба бо 14 ва Озарбойҷон бо 11 дарсад меоянд.

Қирғизистонро 10 дарсад ва Узбекистонро 8 дарсад дӯсти наздики Русия ном бурдаанд. Тоҷикистон бо 7 дарсад дар ин "сабқат"-и дӯстони Русия аз байни кишварҳои пасошӯравӣ танҳо аз Туркманистон (4 фоиз), Гурҷистон (3), Молдова (2) ва Украина, ки танҳо як фоизи пурсидашудаҳо онро кишвари дӯст хондаанд, пеш гузаштааст.

Аммо дар посух ба ин суол, ки кадом кишвар нисбат ба Русия мавқеи аз ҳама ғайридӯстона ва душманона дорад?, 73 дарсад Амрико, 37 дарсад Украина ва 25-дарсадӣ Латвияву Литваро ном бурдаанд. Полша (Лаҳистон)-ро 22 дарсад ва Бритониёро 21 дарсад дар ҷумлаи душманони Русия ном гирифта, ҳамин тавр 19 дарсади пурсидашудаҳо Эстония ва Олмонро душман хондаанд.

Натиҷаҳои ин назарсанҷӣ, ба бовари нозирони умур, таъсири мошини таблиғотии матбуоти Русия ба афкори ҷомеаро мунъакис мекунад. Ба ҳамин далел, барои мисол, Амрикову Украина дар сархатти рӯйхати кишварҳои "душман"қарор гирифтаанд.

Тоҷикони муқими Русия низ дар назари ҳамагӣ 7 дарсади аҳолии Русия кишвари дӯст таъбир шудани Тоҷикистон ва барои як фоизи ин мардум ҳатто кишвари нисбат ба Русия “душман” талаққӣ шуданашро натиҷаи “хидматҳои хирсона”-и матбуоти Русия унвон мекунанд. Онҳо мегӯянд, расонаҳои русӣ Тоҷикистонро асосан ҳамчун як манбаи асосии қочоқи маводи мухаддир ба қалам дода, дар бораи муҳоҷирони тоҷик низ асосан дар робита ба ҷиноятҳои марбут ба қочоқи ҳероину афюн гузориш менависанд ва ин як тасвири умумии манфиеро нисбат ба Тоҷикистону мардумаш дар зеҳни аҳолии Русия эҷод кардааст.

Прокуратураи  шаҳри Кӯлоб дар чаҳорчӯби парвандаи ҷиноӣ  “авбошии сарбозони рус” ҳудуди  20 тан аз низомиёни пойгоҳи Русияро, ки дар  муноқишаи шаби 28-уми июл ширкат доштанд, ба бозпурсӣ  ҷалб кардааст.

Прокуратура нисбати чанд тан аз низомиёни рус бар асоси қисми дуюми моддаи 237-уми Кодекси ҷиноятии Ҷумҳурии Тоҷикистон, яъне  “авбошӣ” айб эълон кардааст.

Тафтишгарони авбошии аскарҳои рус  саҳнаҳои дигареро аз шаби 28 июл низ пажӯҳиш мекунанд. Ба гуфтаи ин манобеъ, “сарбозони  воҳиди пойгоҳи низомии Русия, мустақар дар Кӯлоб шоми 28-уми июл дар ҳолати мастӣ ба хиёбон баромада, ба бетартибиҳо даст задаанд.  Онҳо дар хиёбони Ҳофизи Шерозӣ,  тақрибан 200 метр дуртар аз девори пойгоҳи низомии Русия ба як “Маркази букмекерӣ”- ҷое, ки ҷавонон натиҷаҳои бозиҳои футболро пулакӣ пешгӯӣ мекунанд, ҳамла намуда, тирезаҳои онро шикастанд ва чанд тан аз ҷавонони маҳаллиро маҷрӯҳ карданд. Дар натиҷа ба “Маркази букмекерӣ” даҳ ҳазор сомонӣ зарари молӣ расидааст.”  Ба гуфтаи ҳамин манобеъ, ҷавононе, ки дар ин марказ машғули бозӣ будаанд, ба сарбозон муқовимат карданд ва фавран ба милиса хабар доданд. То расидани милисаҳо низомиёни рус тарбузҳои тарбузфурӯшони маҳаллиро низ зери лагад қарор додаанд ва ҳангоми сангандозӣ тирезаҳои ду хонаи истиқоматиро низ шикастаанд.

Гурӯҳи  дигари низомиёни рус вориди “Маркази букмекерӣ” шуда, навори дурбини назоратиро, ки дар он саҳнаи ҳуҷуми сарбозон ба “Маркази букмекерӣ” сабт шуда буд, нобуд кардаанд. Аммо милиса мегӯяд, ки як нусхаи ин наворро дастрас кардааст. Гуфта мешавад, ки аксари низомиён бар асоси навори дурбинҳои назоратии  “Маркази  букмекерӣ” ба бозпурсӣ ҷалб шудаанд.

Манобеъи наздик ба тафтишот мегӯянд, ки  шаби ҳодиса масъулони сатҳи поёнии пойгоҳи низомии Кӯлоб талош карданд, ки қазияро бидуни боз кардани парвандаи ҷиноӣ ҳал кунанд. Ҳоло мақомот мегӯянд, пас аз анҷоми бозҷӯӣ ин парвандаро барои баррасӣ ба прокуратураи  низомии Русия, воқеъ дар назди пойгоҳи ин кишвар дар Тоҷикистон ирсол хоҳанд кард ва онҳо нисбат ба сарбозону афсарони худ ҳукм содир хоҳанд кард. Тибқи созишномаи соли 2012 имзошуда байни Тоҷикистону Русия, афсарону аскарони пойгоҳи Русия дар Тоҷикистон аз масуният бархӯрдоранд ва қазияҳои марбут ба онҳоро бояд мақомоти худи Русия баррасӣ кунанд.

Мақомоти пойгоҳи низомии Русия дар Тоҷикистон аз сӯҳбат дар ин мавзӯъ худдорӣ мекунанд.

Аммо Наҷмиддин Сафаров, як шоҳиди ҳодиса 11-уми июл гуфтааст, ки ин нафароне, ки ба “Маркази букмекерӣ” ҳамла карданд, тақрибан даҳ нафар буданд, аммо пас аз муқобилияти ҷавонони маҳаллӣ чандин тани дигар аз сари деворҳои пойгоҳ парида, ба кӯмаки онҳо расидаанд.

Ӯ гуфт: “Маълум буд, ки онҳо маст буданд. Аз рӯи гапу рафторашон маълум буд. Аз се тараф ҳамла карданд. Мошини корманди милисаро шикастанд ва тарбузу харбузаи сокинонро пора-пора карданд. Вақте мардум ҷамъ шуд ва милиса омад, онҳо аз занозанӣ пас рафтанд.”

Ин сокини Кӯлоб мегӯяд, ки ин бори аввал нест, ки низомиёни Русия дар Кӯлоб қонуншиканӣ мекунанд. Ӯ мегӯяд, бояд пеши роҳи мастии низомиён гирифта шавад, зеро бештар онҳо дар ҳамин ҳолат даст ба қонуншиканӣ даст мезананд.

Муноқишаи низомиёни рус дар паҳлӯи Маркази табобати бемориҳои сили минтақаи Кӯлоб рух додааст ва ба қавли шоҳидон, ҳатто бархе сангҳо ба боми ин беморхона низ расидааст.

Аммо  Раҳматулло Ҷумъаев, директори Маркази табобати бемориҳои сил дар минтақаи Кӯлоб инро рад кардааст. “Хеле одамони хубанд. Девори мо бо деворашон часпидааст, лекин мо ҳеҷ ҳодисаро мушоҳида накардаем. Ягон бор ба Маркази мо низ зарар нарасониданд,” - Ҷумъаев.